काठमाडौं । लेबनानमा नेपाली सेनाले ठूलो सफलता हात पारेको छ । भारतसहित विभिन्न एक दर्जन देशका सैनिकलाई पछाडि पार्दै नेपाली सेनाले बातावरणीय सुरक्षा पुरस्कार जितेको हो ।शान्ति सैनिक मिशनमा खटिएको युनिफिल मिशन, लेबनानमा तैनाथ नेपाली सेनाको गणले उक्त पुरस्कार जितेको हो ।
युनिफिल मिशन प्रमुख तथा फोर्स कमाण्डर उपरथी स्टेफेन डेल कोलले युनिफिल हेडक्वार्टर, नाकुरामा आयोजित एक विशेष समारोहमा उक्त्त गणलाई अवार्ड प्रदान गरेका थिए । उक्त प्रतिस्पर्धामा फ्रान्स, ईटाली, स्पेन, आयरल्याण्ड, भारत, मलेसिया, दक्षिण कोरिया, इण्डोनेसिया र घाना लगायत राष्ट्रका गण तथा बाहिनीहरुको सहभागिता थियो ।
सुरुमा उत्कृष्ट तीन वटा समूहलाई छनौट गरिएको थियो । युनिफिल हेडक्वार्टरमा गठित समितिले गरेको भोटिङ्गको आधारमा भारतीय सेनालाई पाँच अंकले पछि पार्दै नेपाली सेनाले उक्त पुरस्कार जितेको हो ।यस पुरस्कार युनिफिल मिशन ईलाकाभित्र वातावरणीय तथा पर्यावरणीय क्षेत्रमा असाधारण योगदान दिने व्यक्ति तथा सैनिक व्यारेकहरुलाई वार्षिक रुपमा प्रदान गर्दै आईरहेको छ ।
नेपाली सेनाले आफ्नो व्यारेक हाताभित्र र स्थानीय समुदायलाई समेत लक्षित गरी सृजनशिल, यथार्थपरक र मितव्ययी ढङ्गबाट वातावरणमैत्री कार्य गरी पर्यावरणीय सुरक्षामा दिएको अतुलनीय योगदानको मुल्याकंनको आधारमा उक्त पुरस्कार प्रदान गरिएको जनाइएको छ । निरीक्षण टिमले पहिचान गरेका वातावरणमैत्री कार्यहरुमा खेर गईरहेको पानीको पुनः प्रयोग, वर्षादको पानीको समुचित उपयोग, प्लाष्टिक तथा कागजजन्य वस्तुहरुको पुन प्रयोग, व्यारेक हाताभित्र तथा स्थानीय समुदायमा वृक्षारोपण, सडेगलेको खाध्यपदार्थको कम्पोष्ट मल, थोपा सिंचाई, प्लाष्टिक वोतलहरुको प्रयोग गरी हरित गृह नर्सरी, खेर गएका सामाग्रीहरुको प्रयोग गरी फूलदानी बनाउने जस्ता कार्यहरु प्रमुख प्रोजेक्टको रुपमा गरिएका थिए ।
