प्रधानमन्त्री ओलीलाई उपाध्यक्ष गौतमको सुझाव : राजीनामा दिनुस्, बालकोट गएर बस्नुस्

जन प्रभाब-सम्बादाता / २०७७ बैशाख १४ गते.


काठमाडौं : प्रधानमन्त्री केपी शर्मा ओलीले पार्टी सचिवालयका चार जना नेताहरुसँग छुट्टाछुट्टै भेटवार्ता गरेका छन् ।

पार्टीभित्र विवाद पेचिलो बन्दै गएपछि प्रधानमन्त्री एवं नेकपा अध्यक्ष समेत रहेका ओलीले पार्टीका अर्का अध्यक्ष पुष्पकमल दाहाल ‘प्रचण्ड’, वरिष्ट नेता माधवकुमार नेपाल, उपाध्यक्ष बामदेव गौतम र महासचिव विष्णु पौडेलसँग छुट्टाछुट्टै भेटवार्ता गरेका हुन् ।

शनिबार प्रधानमन्त्रीको सरकारी निवास बालुवाटारमा बोलाएर ओलीले छलफल गरेको बालुवाटार स्रोतले जनाएको छ । भेटमा ओलीले सचिवालय बैठक तत्काल नबोलाउने संकेत गरेको बालुवाटार स्रोतले जनाएको छ ।

त्यसोत ओलीले शुक्रबार प्रमुख प्रतिपक्षी दल नेपाली कांग्रेसका सभापति शेरबहादु देउवासँग भेट गरेका थिए । त्यसलगत्तै ओलीले अध्यक्ष दाहालसँग छुट्टै भेटघाट गरेका थिए ।

तर ओली र गौतमबीच भएको भेटवार्तामा चर्काचकी भएको छ ।

उनीहरु बीच चर्काचर्की मात्र भएन एकले अर्कालाई देखाइदिने सम्मको चुनौती दिए ।

बालुवाटार स्रोतका अनुसार भेटमा नेता गौतमले ओलीलाई वेमौसममा अध्यादेश ल्याएर पार्टी र सरकारकै बदनाम भएको भन्दै तत्काल प्रधानमन्त्री पदबाट राजीनामा गर्न सुझाएका थिए ।

तर, गौतमको यस्तो सुझाव सुनेर आक्राशित बनेका ओलीले यसको हिसाव किताव राम्रैसँग गर्ने जवाफ फर्काएका थिए । नेताहरुबीच विवाद चर्कदै गएपछि एकले अर्कोलाई हैसियत देखाउने सम्मका अभिव्यक्ति दिएका थिए ।

‘तपाईले बेमौसममा अध्यादेश ल्याएर गम्भीर गल्ती गरिसक्नुभयो । यसमा तपाईंको मनस्थिति ठिक देखिएन । अब खुरुक्क राजीनामा दिनुस् र बालकोट गएर बस्नुस् । त्यसैमा तपाईको भलो हुन्छ’, ओलीलाई गौतमको सुझाव थियो ।

गत ८ गते प्रधानमन्त्री ओलीको सिफारिसमा राष्ट्रपति विद्यादेवी भण्डारीले ‘संवैधानिक परिषद् (काम, कर्तव्य, अधिकार र कार्यविधि) सम्बन्धी (पहिलो संशोधन) अध्यादेश, २०७७ र राजनीतिक दलसम्बन्धी (दोस्रो संशोधन) अध्यादेश, २०७७ जारी गरेकी थिइन् ।

अध्यादेश जारी भएलगत्तै नेकपामा चर्को विवाद भइरहेको छ । सोही विषयलाई लिएर पार्टी र बाहिरबाट समेत विरोध हुन थालेपछि प्रधानमन्त्री ओलीले अध्यादेश फिर्ता लिने निर्णय गरेको थियो । शुक्रबारै बसेको मन्त्रिपरिषद् बैठकले अध्यादेश फिर्ता गर्ने निर्णय गरेको थियो ।

मन्त्रिपरिषद्को सिफारिस अनुसार राष्ट्रपतिले शुक्रबार नै अध्यादेश खारेज गरेकी थिइन् ।

ओलीले एकलौटी रुपमा अध्यादेश जारी भएपछि अध्यक्ष दाहाल र नेता नेपाल समूहका स्थायी कमिटी सदस्यले तत्काल बैठक बोलाउनुपर्ने माग राखेका छन् । तर, तत्काल स्थायी कमिटी बैठक नबोलाउने मनस्थितिमा ओली रहेका छन् ।