जन प्रभाब-२०७७ बैशाख ५ गते.

काठमाडौं । नेपाल प्रहरी प्रमुख आइजिपी ठाकुरप्रसाद ज्ञवालीले फिल्डमा खटिने प्रहरीलाई संयमित भएर काम गर्न निर्देशन दिएका छन् ।

अत्यावश्यक सेवामा कार्यरत चिकित्सक, बिरामी तथा पेसाकर्मीलाई प्रहरीले कुटपिट तथा दुर्व्यवहार गरेको भन्दै प्रहरीको चौतर्फी आलोचना भएपछि ज्ञवालीले यस्ता गल्ती दोहोरिन नदिन निर्देशन दिएका हुन् ।

शुक्रबार बिहान प्रहरी प्रधान कार्यालयमा आइजिपी ज्ञवालीले चारैजना अतिरिक्त प्रहरी महानिरीक्षक (एआइजी), उपत्यकाका डिआइजी तथा महानगरीय प्रहरी परिसर काठमाडौं, ललितपुर र भक्तपुरका प्रहरी प्रमुखलाई बोलाएर यस्ता गल्ती पुन: दोहोरिन नदिन निर्देशन दिएका हुन् ।

प्रहरी मुख्यालयले उपत्यकालगायत देशभरका प्रहरी कार्यालयलाई अति आवश्यक अवस्थामा बाहेक बल प्रयोग नगर्न, अत्यावश्यक सेवामा कार्यरत, पेसाकर्मी तथा सर्वसाधारणसँग थप संयमित रूपमा प्रस्तुत भएर समस्याको समाधान गर्न मुख्यालयले परिपत्रसमेत गरेको बैठकमा सहभागी एक प्रहरी अधिकारीले जानकारी दिए । 

गत बुधबार राति त्रिवि शिक्षण अस्पतालमा कार्यरत  चिकित्सकहरू डा. शम्भु खनाल, डा. तेजप्रकाश साह र विकास साहमाथि प्रहरीले कुटपिट गरेको थियो ।

महाराजगन्ज वृत्तका प्रमुख डिएसपी उमेश लम्सालको कमाण्डमा रहेको प्रहरी गस्ती टोलीले ड्युटी सकेर घर फर्कने क्रममा रहेका डाक्टरहरूमाथि कुटपिट गरेको विषयमा नेपाल चिकित्सक संघले कारबाहीको माग गरेको थियो । साथै संघले यस्ता घटना दोहोरिन नदिन आग्रह गरेको थियो ।

डिएसपी लम्सालसहित चिकित्सक कुटपिटमा संलग्न प्रहरीमाथि छानबिन गर्न प्रहरीले समिति गठन गरिसकेको छ । डिएसपी लम्साललाई महाराजगन्ज प्रहरी वृत्तकाे जिम्मेवारीबाट हटाइएकाे छ ।  

उक्त  घटना सेलाउन नपाउँदै पुन: बिहीबार कलंकीमा औषधि किनेर फर्कँदै गरेका सर्वसाधारणमाथि प्रहरीले कुटपिट गरेको भिडियाे सार्वजनिक भएको थियो । संवेदनशील अवस्थामा पनि प्रहरीको गतिविधि मर्यादित र अनुशासित नभएको भन्दै व्यापक आलोचना भएको थियो । 

यस्ता घटनाले प्रहरी संगठन नै आलोचित बनेपछि आइजिपी ज्ञवालीले मातहतका प्रहरी प्रमुखलाई मुख्यालयमा बोलाएर निर्देशन दिएका हुन् ।