काठमाण्डौं । गृहमन्त्री रमेश लेखकले कञ्चनपुरको भीमदत्त नगरपालिकाकी निर्मला पन्त बलात्कारपछि हत्या प्रकरण नयाँ शिराबाट गम्भीर अनुसन्धान थाल्न प्रहरीको केन्द्रीय अनुसन्धान ब्युरो (सीआइबी)लाई निर्देशन दिएका छन् ।
सीआइबीको कार्यालय निरीक्षणका क्रममा मन्त्री लेखकले सुक्ष्म रुपमा निर्मला पन्त प्रकरण अनुसन्धान गरेर दोषीलाई कारबाहीको दायरामा ल्याउन निर्देशन दिएका हुन् ।निर्मला हत्या प्रकरणको अनुसन्धानमा कुनै कसर बाँकी नराख्न निर्देशन दिंदै गृहमन्त्री लेखकले भने–‘निर्मला पन्त लगायत ब्युरोले अनुसन्धान गरिरहेको सबै जटिल घटनाको अनुसन्धानमा तिव्रता दिन आग्रह गर्छु । नेपाल प्रहरीभित्र पनि सीआइबीप्रति आमजनताको भरोसा बढेको छ, यसलाई अटल राखेर काम गर्नुपर्छ ।’
सिमित स्रोत साधनकाबीच प्रहरीमा सिआइबीले कार्यसम्पादनमा सफलता हासिल गर्दै गएकोप्रति खुसी व्यक्त गर्दै मन्त्री लेखकले सिआइबीलाई साधनस्रोत सम्पन्न बनाउन मन्त्रालय गम्भीर रहेको बताउए ।मुलुकमा पछिल्लो समय बित्तिय अपराध बढेको भन्दै उनले त्यसको नियन्त्रणका लागि बित्तिय अपराध अनुसन्धान महाशाखा गठन गरेको जानकारी दिए ।
कार्यक्रममा गृहमन्त्री लेखकले भने–‘प्रहरीप्रतिको भरोसा बढेर गएकै कारण देशभरबाट प्रहरी चौकी माग हुँदै आएको छ । प्रहरीलाई सुविधा सम्पन्न बनाउन विगतको भन्दा चालु आर्थिक बर्षमा तुलनात्मक रुपमा बजेट बढी बिनियोजन गरिएको छ ।’कार्यक्रममा सीआइबीका एसएसपी होविन्द्र बोगटीले सीआइबीले गरिरहेको काम, कारबाही, पाइरहेको सफलता र कार्यसम्पादनमा रहेका चुनौती लगायतका विषयमा प्रस्तुती राखेका थिए ।
एसएसपी बोगटीले सीआइबीले निर्मला पन्त प्रकरणका साथै अरु घटना सम्वन्धमा पनि अनुसन्धान जारी राखेको जानकारी गराएका थिए ।कार्यक्रममा आईजीपी दिपक थापा, सीआइबीका प्रमुख एआईजी चन्द्रकुवेर खापुङ् लगायत सिआइबीका कार्यरत प्रहरी अधिकारी सहभागी थिए ।
कञ्चनपुरको भीमदत्त नगरपालिका–२ उल्टाखामकी १३ वर्षीया किशोरी निर्मला पन्तको बलात्कार र हत्या भएको ७ वर्ष पुगेको छ ।यो ७ वर्षको अवधिमा ५ जना गृहमन्त्री र ६ प्रहरी प्रमुख फेरिए, थुप्रै समिति बने, तर अहिलेसम्म हत्यारा पत्ता लाग्न सकेको छैन । पन्तले न्याय पाउने कुनै सुरसार र संकेतसमेत देखिएको छैन ।२०७५ साल साउन १० गते साथीको घरमा पढ्न जान्छु भनेर निस्केकी निर्मला भोलिपल्ट भीमदत्त नगरपालिकाकै निम्बुखेडा खोला किनारको उखुबारीमा मृत भेटिएकी थिइन् ।
घटनामा संलग्नलाई पक्राउ गरी कारबाही गर्न माग गर्दै भएको आन्दोलनका क्रममा भीमदत्त–१८ का १५ वर्षीय सनी खुनाको ज्यानै गयो ।निर्मलाको हत्या भएदेखि अहिलेसम्म रामबहादुर थापा ‘बादल’, बालकृष्ण खाँण, रवि लामिछाने, नारायणकाजी श्रेष्ठ, फेरि रवि लामिछाने र हाल रमेश लेखक गरी पाँचजना गृहमन्त्री भए ।
नेपाल प्रहरीमा सर्वेन्द्र खनाल, ठाकुरप्रसाद ज्ञवाली, शैलेश थापा क्षेत्री, धीरजप्रताप सिंह, बसन्तबहादुर कुँवर र अहिले दीपक थापा गरी छ जना आईजीपी भए ।हरेक गृहमन्त्री र आईजीपीले निर्मला पन्तको हत्यामा संलग्नको पहिचान गरी कारबाही गर्ने बताउँदै आएका छन् । तर, नतिजा ७ वर्ष पहिला जे थियो, त्यहि नै छ ।
निर्मलाकी आमा दुर्गादेवी पन्तले त केही दिन अघि मात्रै अब आश मरेको भन्दै गुनासो गरेकी थिइन् ।
उनले भनेकी थिइन–‘अब अनुसन्धान गर्छन् या गर्दैनन् त्यो पनि थाहा छैन। हिजोआज त यता आएर कसैले पनि सोधपुछ गरेका छैनन्। मलाई अब आशै मरिसक्यो। अहिलेसम्म कसैले पत्ता लगाएनन् र लगाउँछन् जस्तो पनि लाग्दैन ।
