- काठमाडौं,साउन १४ गते बुधबार ।।
- जनप्रभाब-सम्बादाता
काठमाडौं प्रहरीले मंगलबार १५ किलो पहेँलो धातु र २ थान पेस्तोल बरामद गर्यो । १५ किलो धातुमध्ये ५ सय ग्राम मात्रै सुन भएको प्रमाणित भएको र बाँकी चाँदी र अन्य धातुमा सुनको मात्रै जलप भेटिएको काठमाडौं प्रहरी प्रमुख एसएसपी श्यामलाल ज्ञवालीले जानकारी दिए ।
ज्ञवालीले पत्रकार सम्मेल गरेर नै सो कुराको जानकारी दिएका हुन् । जाँच नहुँदासम्म प्रहरीलाई उक्त परिमाणमा भेटिएको पहेँलो धातु सुन नै हो कि भन्ने अनुमान गरेका थिए ।
तर, जाँचपछि भेटिएको १५ किलोमध्ये ५ सय ग्राम मात्रै सुन भएको प्रमाणित भएको हो । उक्त पहेँलो धातु र पेस्तोल कसकाे हो भन्नेबारे भने प्रहरी अनुसन्धानकै क्रममा रहेको एसएसपी ज्ञवालीको भनाइ छ ।
प्रहरीले फेला पारेको पेस्तोल लोड नभएको अवस्थामा फेला पारेको थियो ।
कसरी फेला पार्यो प्रहरीले सुन र पेस्तोल ?
मंगलबार बिहान ९ बजे प्रहरीले अकस्मात् कमलादीबाट महेन्द्र सालिकतर्फ जाने सडकमा चेक प्वाइन्ट थाप्यो । दरबारमार्ग प्रहरीलाई उक्त क्षेत्रमा तस्करीको सुनको कारोबार हुँदै छ भन्ने सूचना आएको थियो ।
सोही सूचनाका आधारमा महानगरीय प्रहरी वृत्त दरबारमार्गका डीएसपी रञ्जन दाहालसहितको टोलीले चेक प्वाइन्ट थापेका थिए । सोही क्रममा कृष्ण पाउरोटीबाट कमलादीतर्फ सिल्भर रङको बा६च ५५१९ नम्बरको स्कार्पियो तीव्र गतिमा आयो ।
प्रहरीले स्कार्पियोलाई रोक्न खोज्यो । तर, चालकले गाडी रोक्नुको साटो गाडीभित्रबाट सेतो झोला प्रहरीतिर फालेर तीव्र गतिमा कमलादीतर्फ भाग्यो । सोही झोला जाँच गर्दा प्रहरीले १५ किलो पहेँलो धातु र २ थान पेस्तोल फेला पारेको हो ।
कमजोर प्रहरी अप्रेसन
प्रहरीलाई कमलादी क्षेत्रमा तस्करीको सुनको कारोबार भइरहेको सूचना पहिला नै थियो । सोही सूचनाका आधारमा प्रहरी चेक प्वाइन्ट राखेर अप्रेसनमा निस्किएको हो । तर, प्रहरीको उक्त चेक प्वाइन्टमा कमाण्ड कमजोर हुँदा प्रहरीको चेक प्वाइन्टबाट नै १५ किलो पहेँलो धातु र २ थान पेस्तोल फाल्ने अपराधी प्रहरीकै अगाडि स्कार्पियोसहित भाग्न सफल भएका हुन् ।
प्रहरीले उक्त स्कार्पियोलाई पिछा गर्न नसकेको जनाएकाे छ । तर, उपत्यकाकै प्रमुख स्थान कमालादीबाट नै दिउँसै अपराधी स्कार्पियोसहित भाग्नुलाई सुरक्षाको हिसाबले कमजोरी मानिने केही पूर्वप्रहरी अधिकारीको बुझाइ छ ।
कमलादीको चेक प्वाइन्टबाट पहेँलो धातु र पेस्तोल छाडेर गाडीसहित अपराधी भाग्नुलाई सामान्य घटना मान्न नसकिने पूर्वडीआईजी हेमन्त मल्लको भनाइ छ ।
‘घटनाको प्रकृति हेर्दा ठ्याक्कै प्रहरीको अप्रेसन कमजोर भन्नै त मिल्दैन । तर, प्रहरीले पाएको सूचना अपूराे जस्तो लाग्छ । अर्को अप्रेसनमा पनि केही तयारी नपुगेको हो कि भन्ने देखिन्छ,’ मल्लले भने । यस्तो कमजोरीले प्रहरीमाथिको शंकाको सुविधा बढ्ने उनको भनाइ छ ।
प्रहरीले चेक प्वाइन्टबाट पहेँलो धातु र पेस्तोल फाल्ने गाडी र चालक नियन्त्रणमा लिन नसके पनि नम्बर प्रहरीले टिप्न सफल भएका कारण केही दिनमा अपराधी प्रहरीको नियन्त्रणमा आउने एसएसपी ज्ञवालीको दाबी छ ।कृष्णसिंह लाेथ्याल
