झापा । सीमावर्ती क्षेत्रमा विभिन्न किसिमका अपराधिक घटना घट्नेक्रम बढ्दो छ । तराई–मधेशका क्षेत्रमा भारतीय किलर ल्याएर मानिसको ज्यान लिने घटना घटिरहेका बेला झापामा बच्चाहरु चोरी हुने गरेको भन्दै त्रासदी फैलिरहेकाबेला एक भारतीय नागरिक बालक चोर्दा चोर्दै पक्राउ परेका छन् । दिनदहाडै अभिभावक नभएको मौका छोपेर स–साना बच्चा चोर्ने प्रयास भएपछि स्थानीयहरु त्रसित बनेका छन्
झापाको हल्दिवारी गाउँपालिकामा बच्चा चोर्दाचोर्दै एक भारतीय युवक पक्राउ परेका छन् । हल्दिवारी गाउँपालिका ४ मा बच्चा चोरेको आरोपमा अन्दाजी २५ वर्षीय भारतीय युवक पक्राउ परेका हुन् । सोमबार बिहान करिब १० बजेको समयमा बुद्ध उराव नाम गरेका भारतीय नागरिकले स्थानीय रुद्र मैनालीको चिया बगानमा मजदुरी गर्दै आएका लोकमान र लक्ष्मी राईका १० महिनाका छोरालाई कोक्रोबाटै उठाउन थालेका थिए । आफ्नो सानो छोरालाई चोरेर लैजान आँटेको देखेपछि ती भारतीय युवालाई परिवारले समातेर प्रहरीको जिम्मा लगाएका छन् ।
आमाको पहिरन लगाएर १० महिनाका छोरालाई कोक्रोबाटै उठाएर लैजान लागेको देखेपछि शिशुका बाबुले बच्चा बचाउन सफल भएका हुन् ।घरबाटै बालबच्चाहरु चोरी हुन थालेपछि स्थानीय त्रसित भएका छन् । चोरी गर्दा गर्दै फेला परेकाले शिशुलाई चोरबाट जोगाउन सफल भए पनि यस्ता घटनाहरु अन्यत्र पनि हुन सक्ने भन्दै त्रासदी छाएको छ । आफ्नो गाँउमा नै यस्तो गतिविधि भएपछि अब सुरक्षामा थप सजकता अपनाउनुपर्ने स्थानीयको भनाई छ ।
भारतको इस्लामपुर घर भएका भारतीय युवक बुद्ध उराव केहि बर्ष अघिदेखि झापाकै विर्तामोड १० मा बस्दै आएका थिए । उनको मानसिक सन्तुलन ठीक नभएको आशङ्का प्रहरीको छ । उराउलाई पक्राउ गरी घटनाका बारेमा अनुसन्धान भइरहेको जिल्ला प्रहरी कार्यालयका प्रवक्ता डीएसपी खगेन्द्रप्रसाद रिजाल बताउँछन् ।
दिनदहाडै अभिभावक नभएको मौका छोपेर स–साना बच्चाहरु चोर्ने ठुलै गिरोह सक्रिय रहेको हुन सक्ने भएकाले स्थानीयवासीमा सन्त्रास फैलिएको छ । सबै अभिभावक आफ्नो सन्तानको रेखदेखमा सचेतता अपनाउन जरुरुी छ । प्रहरी प्रशासनले पनि यस्ता गतिबिधि हुन नदिन शंकास्पद् व्यक्तिहरुलाई निगरानी राख्दै सुरक्षामा थप सक्रियता बढाएको जनाएको छ ।
