काठमाडौं । मन्त्रिपरिषद्को बुधबार बसेको बैठकले नेपाल सरकारले प्रदान गर्ने विभूषणको स्पष्ट मापदण्ड बनाउने निर्णय गरेको छ । सिंहदरबारस्थित प्रधानमन्त्री तथा मन्त्रिपरिषद्को कार्यालयमा बसेको बैठकले उचित व्यक्तिलाई सम्मान र वितरणमा विवाद नहोस् भन्ने उद्देश्यले विभूषण अध्ययन समिति बनाउने बनाउने निर्णय गरेको हो ।
उपप्रधानमन्त्री एवं अर्थमन्त्री विष्णुप्रसाद पौडेलका अनुसार आजको बैठकले सरकारको नीतिगत प्राथमिकता र न्यूनतम कार्यक्रम कार्यान्वयनका लागि एक साताभित्र कार्ययोजना निर्माण गरी मन्त्रिपरिषद् बैठकमा पेस गर्न पनि सम्बन्धित मन्त्रालयलाई निर्देशन दिएको छ ।
उनले भने, ‘कूटनीतिक नियोगलगायत विदेशी प्रतिनिधिहरूलाई मन्त्रीहरुले भेट्दा परराष्ट्र मन्त्रालयको प्रतिनिधिको उपस्थिति अनिवार्य गर्नेे निर्णय गरेको छ । यो सरकारको नीतिगत प्राथमिकता र न्यूनतम कार्यक्रम पनि हो । न्यूनतम कार्यक्रम कार्यान्वयनका लागि रहेका मन्त्रालयहरुसँग सम्बन्धित विषयहरूमा आवश्यक कार्ययोजना निर्माण गर्न सात दिनको समय प्रधान गरिएको छ ।’
बैठकले उखुको मूल्य प्रतिक्विटल ५४० रुपैयाँ निर्धारण गरेको अर्थमन्त्री पौडेलले बताए । उनले भने, ‘मन्त्रिपरिषद् बैठकले प्रतिक्विन्टल उखुको मूल्य ५४० रुपैयाँ र सरकारले व्यहोर्ने ढुवानी भाडा ७० रुपैयाँ निर्धारण गरेको छ ।’
क्रसर उद्योगसँग सम्बन्धित समस्याबारे आजको बैठकमा छलफल भए पनि ठोस निर्णय नभएको उनको भनाइ छ । उनले भने, ‘बैठकमा क्रसर उद्योगसँग सम्बन्धित समस्याबारे छलफल भएको छ तर केही निर्णय भएन । थप अध्ययन गरेर हामी उपयुक्त निर्णयमा छिटै पुग्नेछौं ।’
त्यस्तै आजको बैठकले दुई मन्त्रालयका सचिव फेरबदल गर्ने निर्णय गरेको छ । बैठकले ऊर्जा, जलस्रोत तथा सिँचाइ मन्त्रालयका सचिव केशव शर्मा भौतिक पूर्वाधार तथा यातायात मन्त्रालय र भौतिक पूर्वाधार तथा यातायात मन्त्रालयका सचिव गोपाल सिग्देल ऊर्जा, जलस्रोत तथा सिँचाई मन्त्रालयमा सरुवा गरेको छ ।
त्यस्तै बैठकले सरकारको प्रवक्ता सञ्चार तथा सूचना प्रविधिमन्त्री रेखा शर्मा र विश्वविद्यालय अनुदान आयोगको अध्यक्षमा प्राध्यापक डा. देवराज अधिकारीलाई नियुक्त गर्ने निर्णयसमेत गरेको छ ।
