म्याद गुज्रिएको मैदासहित मुन्डरा नियन्त्रणमा, प्रहरीलाई चुनौती दिँदै फेयर एण्ड लव्लीको कारोबार

लहान, २२ बैशाख । ईलाका प्रहरी कार्यालय लहानले म्याद गुज्रिएको खाद्यान्न विक्रीवितरणमा राखेको भन्दै लहानका नामुद व्यापारी पवन मुन्डरालाई नियन्त्रणमा लिएको छ ।
बजार अनुगमन टोलीले लहान ५ स्थित मुन्डराको गोदामबाट ट्रकमा लोड गरिरहेको अवस्थामा म्याद गुज्रिएको मैदा बरामद गरेको छ ।
प्रहरीले गोदाममा रहेको २८ बोरा म्याद गुज्रिएको मैदा बैशाख २१ गते साँझ सवा ६ बजे बरामद गरिएको छ । ५० केजीको २८ बोरा म्याद गुज्रिएको मैदासहित व्यापारी मुन्डरालाई नियन्त्रणमा लिएको ईलाका प्रहरी कार्यालय लहानका डिएसपी शरत थापाक्षेत्रीले बताए ।
डिएसपी थापाले लकडाउनको वेला शुपथ मूल्यमा सफा ताजा मालसमान पाउनुपर्ने । तर यस्तो अवस्थामा म्याद गुज्रिएका खाद्यान्न खपत हुन सक्ने र समानको कृत्रिम आभाव देखाएर अनुचित नाफा लिन सक्ने भएकोले कानुनी दायरामा ल्याउन नियन्त्रणमा लिएको बताए ।
वीरगन्ज खाद्य उद्योग प्रालि परवानीपुर पर्सा नेपालद्वारा उत्पादित राजहंस ब्रान्ड उच्चस्तरको मैदा आधुनिक मेसिनबाट उत्पादित भनिएको मैदा तीन महिना पहिले म्याद गुज्रिएको जिल्ला उद्योग वाणिज्य संघ लहानका अध्यक्ष अशोकलाल अमात्यले बताए ।
अध्यक्ष अमात्यले म्याद गुज्रिएको मालसमान यो लकडाउनमा कम्पनीलाई फिर्ता गर्न राखिएको जिकिर गरेको छ । म्याद गुज्रिएको यो मैदा व्यापारीले नष्ट गर्न कम्पनीसँग पटक पटक छलफल गरिएको उनको दावी छ ।
व्यापारी मुन्डरा विगत लामो समयदेखि तेस्रो मुलुकको मालसमान सिमापारी पठाउँने कारोबार गर्दै आएका छन् । उनले मरिच, छोहरा, मटरलगायत तेस्रो मुलुकको मालसमान भारत निर्यात गर्दै आएका थिए । उनले सिरहाको झाझपटी, कचनारी, ठाडी, सप्तरी, सुनसरीको विभिन्न नाकाबाट प्रहरी प्रशासनलाई चुनौती दिँदै कारोबार गर्दै आएका थिए ।
सिरहामा कडाई गरेपछि मुन्डारले यस्ता तेस्रो मुलुकको मालसमानको वील विराटनगर, इनर्वालगायतको बजारमा आपूर्ती गर्ने भन्दै कोशी ब्यारेज नजिकको भन्सारबाट कारोबार गर्दै आएको थियो ।
भारतका कम्पनीले नेपालमा उत्पादन गर्दै आएका फेयर एण्ड लव्ली प्रहरी प्रशासनलाई चुनौती दिँदै भारतीय बजारमा पठाउँने मुन्डराको मुख्य कारोबार हो ।
मुन्डराको यस्ता कारोबारलाई सिरहामा अबरुद्ध हुन थालेपछि उद्योग वाणिज्य संघ लहानले पटक पटक प्रहरी प्रशासन, स्थानीय सरकारका जनप्रतिनिधि, सांसदहरुलाई भेला गराएको थियो ।
मुन्डराको कारोबारलाई बढावा दिन नेपाली काँग्रेसका केही साँसद र नेताहरु कसरत गरेको थियो । उता, काँग्रेसपक्षले पटक पटक गैरकानुनी कारोबार गर्ने मुन्डरालाई संरक्षण दिनुपर्ने आवश्यक नरहेको जिकिर गरेको छ ।
यता, मधेशवादी दलका केही नेता कार्यकर्ता मुन्डराको कारोबारलाई संरक्षण गर्ने भन्दै पार्टीमा अपनाउँन कसरत पनि गरेको थियो । मुन्डरा नेकपा विरोधी मानिएको भन्दै उनको कारोबारमा चफुचक्कर लागेको लहानका व्यापारीहरुको दावी छ ।
कुनै पनि गुणस्तरहीन, म्याद समाप्ती, बिल विजक नभएका, लेभल नभएका वस्तु ढाँटेर वा झुक्याएर विक्रि वितरण गरेमा २ देखि ३ लाख रुपैयाँ जरिवाना गर्ने कानुनी प्रावधान छ ।