वीपी कोइरालाको खानेपानीका कारण संस्थान मर्जमा ढिलाई

• धरान,फागुन १३ गते बिहिवार ।।

• जनप्रभाव न्यूज

खानेपानी संस्थान धरान शाखा र वीपी कोइराला स्वास्थ्य विज्ञान प्रतिष्ठान विच भएको पानी आपूर्ति व्यवस्थापन कार्यको रेखदेख नहुँदा मर्मत कार्यको लागि ५० लाख रुपया खर्च हुने भएको छ । धरान उपमहानगरपालिकाको खानेपानी बोर्डले संस्थान जिम्मा लिँदा वीपीको पानी व्यवस्थापनमा पनि जिम्मा लिनुपर्ने हुन्छ ।

जिम्मा लिनुअघि संस्थानको खानेपानी प्रणाली व्यवस्थापनको अध्ययन गर्दा वीपीको खानेपानी प्रणालीको दशौं वर्ष देखी मर्मत सम्भार नभएको पाइएको हो । वीपीमा पानी आपूर्ति गर्न छुट्टै प्रणाली छ । त्यो प्रणाली विग्रीएपछि मर्मत सम्भार नगरी संस्थानले धराबासीलाई आपूर्ति गर्ने खानेपानी कटौती गरे वीपीलाई आपूर्ति गर्न थालेको पाइएको हो ।

खानेपानी बोर्डका निर्देशक राजु पोखरेलका अनुसार वीपीको खानेपानी प्रणाली अध्ययन गरेका ४ जना इञ्जिनीयरले दिएको प्रतिवेदन अनुसार वीपीमा पानी आपूतिका लागि बनाइएको २ वटा पम्प पानी नआउने भएकाले प्रयोग विहीन अवस्थामा छ । पम्पघर भत्किएर खण्डहर बनेको छ । पानी तान्ने जेनेरेजटर, विद्युतीय प्रणाली लगायतका उपकरण खिया लागेर कबाडी भएका छन् । दुवै पम्प चलाउन तत्काल अल्पकालिन मर्मत खर्च ५० लाख रुपया लाग्ने उनले बताए ।

वीपीको खानेपानी प्रणालीको अध्ययन खानेपानी संस्थानका प्रमुख, बोर्डका दुई जना र प्रतिष्ठानका दुई जना इञ्जिनियर सहितको टोलीले गरेको हो । वीपीले संस्थानलाई बुझाउने दशौं लाख रुपया महशुलबाट त्यहाँको खानेपानी प्रणाली सञ्चालन गर्न छुट्टै १४ जना संस्थानका कर्मचारी छन् । तर खानेपानी जस्तो सम्बेदनशील कुरामा प्रतिष्ठान गैरजिम्मेवार रहेको र संस्थानले सर्वसाधारण लाई आपूर्ति गर्ने पानी कटौती गर्दै आएको पाइएको हो ।

संस्थान लाई बोर्डमा गाभ्ने कुरा फेरी उठेपछि उपमहानगरपालिकाले संस्थान र वीपी लाई त्यहाँको खानेपानी व्यवस्थापन र अवस्थाका बारेमा तत्काल ताकेता गरेको मेयर तिलक राईले नगरसभाको उद्घाटनका दिन सार्वजनिक रुपमा बताएका थिए । त्यस्को परिणाम स्वरुपमा इञ्जिनीयरहरुको टोलीले उपमहानगरपालिका लाई प्राविधिक प्रतिवेदन दिएको हो । प्रतिवेदनमा उल्लेख भएका प्रणाली पूनः निर्माण गर्न उपमहानगरपालिका र वीपी प्रतिष्ठानका विच मंगलवार छलफल भएको छ ।

मेयर तिलक राई, उपमेयर मञ्जु भण्डारी, प्रमुख प्रशासकिय अधिकृत विदुर प्रसाद खनाल, वातावरण महाशाखाका भेषराज घिमिरे, खानेपाी बोर्डका निर्देशक राजु पोखरेल र वीपी प्रतिष्ष्ठानका उपकुलपति डा. ज्ञानेन्द्र गिरी, रेक्टर, रजिष्ट्रार र प्रतिष्ठानका इञ्जिनियर विच भएको छलफलले बेकम्मा भएको प्रणाली लाई पूननिमार्ण गर्न सहमति कायम गरेको उपमहानगरपालिकाले जनाएको छ ।

छलफल प्रतिष्ठानको माताहतमा रहेका संस्थानले मर्मत नगरेका खानेपानीका संरचनाहरु मर्मत नभएका बुंदाहरुमा केन्द्रित थियो । निर्देशक पोखरेलका अनुसार प्राविधिक प्रतिवेदनमा उल्लेख भएका वुंदाहरु लाई अल्पकालिन रुपमा तुरुन्तै गर्नुपर्ने कामहरुको विश्लेषण पनि गरिएको छ । अल्पकालिन रुपमा इलेक्ट्रो मेकानिकल कामहरु र मर्मतका कामहरु गर्न ५० लाख रुपया लाग्ने अनुमान गरिएको छ । दिर्घकालिन रुपमा दुई वटा ट्यू वेल बनाउनै पर्ने देखिएको छ ।