काठमाडौं । प्रहरी महानिरीक्षक (आईजिपी) बसन्त बहादुर कुँवरले प्रहरी संगठनलाई अब थप लान्छित हुने अवस्था नआउने दाबी गरेका छन् । आईजी कुँवरले प्रहरी संगठन बदनाम गराउने व्यक्तिको समेत निगरानी बढाएको बताए ।
केहि धमिरा प्रवृतिका प्रहरीका कारण सिंगो संगठनको गरिमामा आँच आउने अवस्था देखिएको भन्दै जनप्रभाव सँगको कुराकानीमा प्रहरी महानिरीक्षक कुँवरले अब प्रहरी संगठनका ‘धमिरा’ लाई छानीछानी फाल्ने बताएका हुन् ।
प्रहरी महानिरीक्षक कुँवरले भने, ‘संगठनलाई बदनाम गराउने कीरा, धमिरा फाल्न लागिरहेको छु । एक व्यक्तिको कारणले संगठनकै बदनामी हुने दिन आयो भने कदापी सह्यै हुने छैन । आफूलाई सुधार नगर्ने तर, संगठनलाई नै बदनाम बनाउन खोज्नेहरुलाई खोजीखोजी फाल्छु ।’
‘केही प्रहरी कर्मचारीले गर्दा सिङ्गो प्रहरी संगठन र इमान्दार प्रहरी अधिकारीहरु समेत लाञ्छनाको शिकार हुनु परिरहेको अवस्था छ,’ उनले थपे, ‘सुध्रिने मौका दिइसकेको छु । नसुध्रेमा अब यस्ता धमिरालाई टिपेर फाल्नै नै हो । यसमा सबैको साथको खाँचो छ ।’
नागरिक र सरकारको प्रहरीसँग विश्वास भएकाले नागरिकमैत्री भएर काम गर्नसमेत आईजी कुँवरको निर्देशन छ । ‘प्रहरीले निष्ठा र इमानदारीका साथ काम गर्न सके नागरिकको मनमनमा र दिलदिलमा बस्न सकिन्छ,’ उनले कुराकानीमा भने ।
प्रहरीले कुनै गल्ती गर्नु हुँदैन भन्ने अपेक्षा जनताको रहेको भन्दै हरेकले ‘म प्रहरी हुँ, राम्रो गर्नुपर्छ र गलत बाटोमा लागेको साथीलाई सच्याउनु पर्छ’, भन्ने भावनाले काम गर्न सम्भव भएको आईजी कुँवरको बुझाई छ ।
