काठमाडौँ । नेपाली कांग्रेसभित्र खुल्ला रुपमै गुट उपगुट चल्छ । गुटगत आधारमै सत्तादेखि संघ संगठनमा भागबण्डा खोजिन्छ । पार्टी नेतृत्वदेखि केन्द्रमा पाका उमेरमा नेताहरुलाई राजनीति बुझेको ठान्ने कांग्रेसमा पछिल्लो समय भने युवाहरु पार्टीको आन्तरिक प्रतिष्पर्धाबाट महामन्त्री लगायत पदाधिकारीकै हैसियत बनाएका छन् ।
तर युवाहरुले महामन्त्रीको हैसियत बनाउँदा पनि पार्टी सभापति शेरबहादुर देउवाले उनीहरुसँग टेरपुच्छर लगाएका छैनन् । सधैं पुरातनवादी शैलीमा चल्दै आएको नेपाली कांग्रेसलाई कुनै समय पाकापुस्ताका नागरिकको राम्रो साथ थियो ।
२०४८ सालमा एक्लै दुई तिहाईको सरकार बनाउन सफल नेपाली कांग्रेस एकपछि अर्को गरी खुम्चिँदै जान थाल्यो । विभिन्न टुक्रामा विभाजित कम्युनिष्ट पार्टीहरु भन्दा पनि कांग्रेस कमजोर बन्दै गयो । २०७४ सालको आम निर्वाचनमा थोरै उकासिएको कांग्रेस ७९ सालको निर्वाचनमा एक्लै चुनावमा भाग लिने आँटै गरेन ।
७९ सालको स्थानीय तहको चुनावमा गठबन्धन बनाएर जाने निर्णय सभापति शेरबहादुर देउवाले लिए । देउवाको निर्णयबाट इतर पक्षले असन्तुष्टि जनाइरह्यो । तर पार्टीभित्रको विरोधको वेवास्ता गर्दै अघि बढेका देउवा संघ र प्रदेशको निर्वाचनमा पनि गठबन्धन बनाएर अघि बढ्ने निश्कर्षमा पुगे । संघ र प्रदेशको निर्वाचनमा पनि इतर पक्षले त्यसरी नै विरोध गरिरह्यो ।
विरोधको देउवाले कुनै प्रवाह नै गरेनन् । सिद्धिएको कांग्रेसलाई गठबन्धन गरेरै भए पनि देउवाले जोगाए । र, कांग्रेस पहिलो पार्टी बन्यो । चुनावपछि चुनावी गठबन्धनकै सरकार बन्न तयारी भइरहँदा गठबन्धन भत्कियो । माओवादी अध्यक्ष प्रचण्ड एमालेको समर्थनमा प्रधानमन्त्री बनेपछि देउवाकै हठका कारण सत्ता फुत्किएको भन्दै कांग्रेसमा फेरि अर्को आक्रोश चुलियो । तर देउवाले कुटनीतिक पहल गरी भत्किएको गठबन्धलाई पुरानै ट्रयाकमा फर्काए । तर पनि इतर पक्षले देउवाविरुद्ध तुष पोखिरह्यो ।
पछिल्लो समय पार्टी नेतृत्वको विरोध गर्नेमा कांग्रेस महामन्त्री गगन थापा सबैभन्दा अगाडि छन् । थापाले अब टुलुटुलु हेरेर नबस्ने अभिब्यक्ति दिइरहेका छन् ।
कांग्रेस महामन्त्री थापा मात्र होइन, पार्टीका युवा नेता कार्यकर्ताहरुले पार्टी सभापति देउवाप्रति आक्रोश पोखिरहेका छन् । नेतृत्वको पुरातन शैलीले पार्टी सक्किएको बताइरहेका छन् । कोही नेतृत्वविरुद्ध अभिब्यक्ति दिँदै हिडेका छन् भने कसैले पार्टी रुपान्तरण गर्ने भन्दै आफूखुशी अभियान चलाइरहेका छन् । कांग्रेसका युवा नेताहरु मात्र होइन, पार्टी सभापतिको कार्यशैलीप्रति पाका नेताहरु पनि सन्तुष्ट छैनन् ।
कांग्रेस नेतृत्वप्रतिको असन्तुष्टि त्यसै चुलिएको पनि होइन । कांग्रेस १३ भ्रातृ संगठन र २६ सुभेच्छुक संस्था पार्टीको आन्तरिक द्वन्द्वका कारण निश्क्रिय जस्तै छन् । तर देउवाले जतिसुकै विरोध गरेपछि वेवास्ता गर्दै अघि बढिरहेका छन् । पार्टी कमजोर बनेको भन्दै आफ्नो आलोचना भइरहँदा उल्टै देउवाले कसैको विरोध गरेर पार्टी बलियो नहुने जवाफ फकाई दिएका छन् ।
देउवाकै सहमतिमा सरकारले नागरिक उन्मुक्ति पार्टीका नेता रेशम चौधरीलाई आममाफी, प्रधानमन्त्रीको सिफारिसमा राष्ट्रपतिबाट नागरिकता विधेयकको प्रमाणीकरण तथा बजेटमार्फत सांसद विकास कोषको व्युँताउने काम गर्यो ।
देउवालाई लगाउन भन्दै महामन्त्री थापाले पार्टीमा टुटुटुलु हेरेर नबस्नेदेखि पार्टी जिम्मेवारी नै छाड्ने चेतावनी दिए पनि देउवा गलेका छैनन् भन्ने यो अभिब्यक्तिले स्पष्ट गरिरहेको छ । पार्टी सभापति देउवाको शैलीलाई नसहने भन्दै सार्वजनिक अभिब्यक्ति दिँदै आएका थापाले अब कस्तो आँट गर्लान्, त्यो भने हेर्न बाँकी नै छ ।
फेसबुकबाट तपाईको प्रतिक्रिया !