काठमाडौं । अमेरिकी नागरिकता त्याग नगरी झुटा विवरण पेश गरेर नेपाली राहदानी बनाएको आरोपमा प्रहरीले अनुसन्धान गरिरहेका राष्ट्रिय स्वतन्त्र पार्टीका सभापति रवि लामिछाने उपप्रधानमन्त्रीसहित गृहमन्त्री बनेका छन् ।
चितवन-२ बाट चुनाव जितेका लामिछाने आज (सोमबार) उपप्रधान तथा गृहमन्त्री बनेका हुन् । उनले पदभारग्रहण गरिसकेका छन् । गृहमन्त्री लामिछानेविरुद्धको अवौध नागरिकताको मुद्दामा जिल्ला प्रहरी परिसर काठमाडौंले छानबिन गरिरहेको छ ।
प्रहरी प्रधान कार्यालयका अनुसार उनका अमेरिकी कागजातको विवरण माग गर्दै अमेरिकी दूतावासलाई पत्राचार गरिएको छ । तर अहिलेसम्म जवाफ भने आइसकेको छैन । उनविरुद्धको मुद्दा अगाडि बढाउन प्रहरीले दूतावासको जवाफ पर्खिरहेको छ ।
तर अब प्रहरी उनकै निर्देशनमा चल्नेछ । नेपाल प्रहरी र सशस्त्र प्रहरी गृह मन्त्रालय मातहत हुन्छन् । यस्तै उनले विवाद झेलिरहेको नागरिकताको सबै विषय गृह मातहत नै हुन्छ । जिल्ला प्रशासन कार्यालय पनि गृह मातहत नै हुने भएकाले आफ्नो मुद्दा हेर्ने सबै अधिकारीहरुलाई अब लामिछानेले नै निर्देशन दिनेछन् ।
गत मंसिर चार गते भएको प्रतिनिधिसभा निर्वाचनमा गृहमन्त्री लामिछानेले उम्मेदवारी दिएका थिए । मनोनयन दर्ता गरेर प्रचार थालेसँगै मुख्य निर्वाचन अधिकृतको कार्यालयमा उनीविरुद्ध उजुरी पर्यो । उनले दोहोरो नागरिकता लिएको भन्दै उम्मेदवारी खारेजीको माग उजुरीमा गरियो । उक्त उजुरीमा मुख्य निर्वाचन अधिकृतको कार्यालय चितवनले सात दिनको स्पष्टीकरण पनि सोध्यो ।
मंसिर ४ को निर्वाचन सम्पन्न भयो, लामिछानले लोकप्रिय मतसहित निर्वाचन जिते । निर्वाचन आयोगले लामिछानेमाथि परेको नागरिकता र पासपोर्ट कीर्ते विवाद आफूले हेर्ने क्षेत्राधिकार नभएको भन्दै गृह मन्त्रालय पठायो । अधिवक्ता युवराज सफलले गृह मन्त्रालयमा पनि उजुरी दिए ।
नागरिकता वितरण गर्ने निकाय जिल्ला प्रशासन कार्यालय गृह मन्त्रालय अन्तर्गत पर्ने भएकाले त्यहाँ उजुरी गरिएको थियो । उनी विरुद्ध अख्तियार दुरुपयोग अनुसन्धान आयोगमा पनि उजुरी परेको थियो । उक्त उजुरीलाई गृह मन्त्रालय नै अख्तियारले पठाएको थियो ।
सबैतिरबाट गृहमै जम्मा भएको उजुरीमा अनुसन्धान सुरु नै नहुँदा लामिछाने सोही मन्त्रालयको जिम्मेवारीमा पुगेका छन् । गृहमन्त्री भएपछि लामिछानेले आफू विरुद्ध दर्ता भएको उजुरी तामेलीमा पठाउँछन् वा थप छानविनका लागि अघि बढाउँछन् भन्ने प्रश्न अहिले उठेको छ ।
यही विषयबारे गृहमन्त्रीले पदभार ग्रहण गर्दा सञ्चारकर्मीले जिज्ञासा राखेका थिए । उनले अदालति प्रक्रिया भएको अहिले आफू केही नबोल्ने भन्दै ओठे जवाफ दिए । उनले भने, ‘अदालति प्रक्रिया रहेकाले यस (नागरिकता) वियषमा अहिले म केही बोल्न चाहन्न । यसमा सर्वोच्च अदातलाई सहयोग गर्छु ।’
फेसबुकबाट तपाईको प्रतिक्रिया !