प्रधानन्यायाधीशको प्रश्न-‘१४६ सांसद अदालतमै आए भनेर प्रधानमन्त्री तोक्नु संवैधानिक हुन्छ ?’

काठमाडौँ । प्रधानन्यायाधीश चोलेन्द्र शमशेर जबराले अदालतले प्रधानमन्त्री नियुक्तिको आदेश दिनु संवैधानिक हुन्छ त भनेर प्रश्न गर्नुभएको छ । संसद विघटन विरुद्धको मुद्दामाथिको सुनुवाइका क्रममा आइतबार सभामुख अग्निप्रसाद सापकोटाका वकिललाई प्रन्या जबराले उक्त प्रश्न सोध्नुभएको हो ।

सभामुखको तर्फबाट संवैधानिक इजलासमा बहस गरेका अधिवक्ता मेघराज पोख्रेललाई प्रन्या जबराले सोध्नुभयो, ‘१४६ जना सांसद अदालतमै आएका छन् । अब उनीहरूसँग बहुमत छ भनेर अदालतले नै प्रधानमन्त्री नियुक्त गर्ने आदेश दिनु संवैधानिक हुन्छ त ?’उक्त प्रश्नको जवाफमा अधिवक्ता पोख्रेलले अदालतले प्रधानमन्त्री तोक्ने नभएर संविधानको उचित व्याख्या गरिदिनुपर्ने बताउनुभयो ।

उहाँले प्रतिनिधिसभाका बहुमत सदस्यहरूले विपक्षी गठबन्धनका शेरबहादुर देउवालाई प्रधानमन्त्री बनाउन समर्थन गरेको स्मरण गराउँदै १४६ जना सांसद अदालतमै आएकोले बहुमत उहाँको पक्षमा रहने दावी गर्नुभयो ।सभामुखकाे तर्फबाट बहस सकिएपछि आजै रिट निवेदक पक्षका वकिलले जवाफी बहस सुरु गर्नेछन् । उक्त मुद्दामा प्रतिनिधिसभा पुनर्स्थापनासँगै प्रधानमन्त्रीमा शेरबहादुर देउवालाइ नियुक्तिकाे आदेश दिन रिट निवेदक १४६ सांसदलगायतकाे माग रहेकाे छ ।