नेकपा बिवाद प्रकरण : कार्यकारी अध्यक्ष प्रचण्डलाई प्रधानमन्त्री ओलीको नयाँ अफर

• काठमाडौँ, मंसिर २५ गते बिहिवार ।।

• जनप्रभाव : सम्बादाता

सत्तारुढ दल नेपाल कम्युनिस्ट पार्टी ( नेकपा ) का दुई अध्यक्ष केपी शर्मा ओली र पुष्पकमल दाहालबीच संवादहीनता तोडिएको छ ।

प्रधानमन्त्री निवास बालुवाटारमा अध्यक्ष दाहाललाई बोलाएर ओलीले सहकार्यको प्रस्ताव राखेका छन् । आफूहरू दुईजना मिले सबै समस्या समाधान हुने र अरु नेतालाई महत्व नदिए पनि हुने आशय प्रधानमन्त्री ओलीले व्यक्त गरेका हुन् ।

प्रधानमन्त्री ओलीले पार्टीभित्रको विवाद धेरै लम्ब्याउन नहुने र एकले अर्कालाई अविश्वास गर्ने तहबाट ओर्लेर सहमतिको आधार तय गरौं भन्दै कार्यकारी अध्यक्ष दाहाललाई सहकार्यको प्रस्ताव राखेका थिए । प्रधानमन्त्री ओलीले पार्टीभित्र अनेकन समस्या रहेको बताउँदै तत्कालीन एमालेको समग्र पार्टीको संरचना अवस्था र नेताहरूको व्यवहारबारे पनि कार्यकारी अध्यक्ष दाहाललाई जानकारी गराएका थिए ।

आफूहरू दुईजना मिलेपछि सबै विषय टुंगो लाग्छन्, पार्टी र नेता कार्यकर्ताको हित पनि यसैमा हुन्छ भनेर प्रधानमन्त्री ओलीले सहकार्यको प्रस्ताव राखेका थिए । अध्यक्ष दाहालले मुन्टोमात्रै हल्लाएको केही नबोलेको स्रोतले बतायो । ‘प्रधानमन्त्री ओलीले सहकार्यको प्रस्ताव राख्दा अध्यक्ष दाहालले हाँसेर मुन्टोमात्रै हल्लाउनुभयो, प्रतिक्रिया दिनुभएन’, स्रोतले भन्यो ।