- सर्लाही ,असोज २९ बिहीबार ।।
- जनप्रभाब
सर्लाहीको रामनगर गाउँपालिकामा ६५ वर्षीय महेन्द्र रामको हत्या विषयलाई लिएर सर्लाहीमा झडप भएको छ ।
उक्त घटनामा संलग्नलाई नियन्त्रणमा लिएर कारबाहीको दायरामा ल्याउन र मृतकको शव परिवारको जिम्मा लगाउन माग गर्दै भएको शान्तिपूर्ण प्रर्दशनमा प्रहरीले बल प्रयोग गरेको कांग्रेस सांसद अम्रेसकुमार सिंहले बताए ।
प्रहरीले बल प्रयोग गर्दा १३ जना दलित महिला र ४ जना पुरुष घाइते भएका उनीहरुको दाबी छ । शान्तीपूर्ण प्रदर्शनमा सूचना समेत नदिई महिलाहरुलाई पुरुष प्रहरीले आक्रमण गरेको उनीहरुको आरोप छ ।
शान्तिपूर्ण प्रदर्शनमा रहेका आफूसहित संघीय सांसद तथा नेपाली कांग्रेस सर्लाहीका सभापति नागेन्द्र कुमार राय, प्रदेश सांसद बिरेन्द्र कुमार सिंह र उपेन्द्र कुशुवाहलाई प्रहरीले दूर्व्यबहार गरेको संघीय सांसद अम्रेस कुमार सिंहको आरोप छ ।
सर्लाहीका प्रहरी प्रमुख शन्तोष सिंह राठोरका अनुसार प्रहरीले स्थितिलाई नियन्त्रन गर्न लाठी चार्ज गर्नुका साथै ३० राउण्ड हवाई फायर गरेको छ । कार्यालय घेराउ गर्न पुगेको नेपाली कांग्रेस सांसद अमरेशकुमार सिंहसहितको टोलीले प्रहरीमाथी ढुंगामुडा गरेको र प्रहरी कार्यालयको झ्याल फुटाएको प्रहरीको दाबी छ ।
प्रदर्शनकारीले हानेको ढुंगा लागि डीएसपी उद्धबसिंह भाटसहित २२ जना घाइते भएका प्रहरीको दावी छ । गत २२ गते मारिएका मृतकको शव अहिले वीरगन्जस्थित प्रादेशिक अस्पतालमा छ ।
आफन्तले १० लाख क्षतिपूर्तिसहित शहीद घोषणा गर्न माग राख्दै जिल्ला प्रहरी कार्यालय घेराउ गरेका हुन् । हत्यामा संलग्न भनिएका तीन जनालाई प्रहरीले नियन्त्रणमा लिइसकेको प्रहरीको दाबी छ ।
फेसबुकबाट तपाईको प्रतिक्रिया !