- काठमाडौं,साउन ५ गते सोमबार ।।
- जनप्रभाब
कोरोनाको कहरले लपेटिएर सयौं पत्रकार सडकमा पुगेका छन् । अर्बपति भनिने मिडिया हाउसहरुले संकटकालको दुई, तीन महिना पनि धान्न नसकेको बाहनामा धामधम पत्रकारलाई जागिरबाट विदा गर्न थालेपछि पत्रकारको कन्तविजोग हुन थालेको छ । नेपालकै ठूलो भनिएको सञ्चारगृह कान्तिपुर पब्लिकेसन्स्ले नेपाल म्याग्जिन साप्ताहिक बन्द गरेपछि झन्डै ५० जना पत्रकार बेरोजगार भएका छन् ।
बन्दको घोषणा गरेपनि नारी मासिक भने २०७७ भदौ अंकबाट नै सुरु गर्ने तयारी गरेको छ । र, त्यसका लागि पुरानै कर्मचारी र पत्रकारलाई काम लगाईसकेको थाहा भएको छ । तर, कान्तिपुरले बन्द गर्ने घोषणा गरेर पत्रकारलाई विदा गरेपनि नेपालको सम्पादकमा भने वसन्त बस्नेतको नामबाट काठमाडौं पोष्टका सम्पादक सञ्जीव सत्गौवाको नाममा नामसारी गरेको जानकारी हुन आएको छ ।
‘साप्ताहिक’को सम्पादकमा राजाराम गौतमको नामबाट यज्ञशको नाममा नामसारी गरेको छ । बन्द भएको सूचना प्रेस रजिस्टारलाई जानकारी गराउनुको सट्टा सम्पादक नामसारी गरेकोले फेरि ‘नेपाल’ र ‘साप्ताहिक’ सुरु गर्ने त होइन भन्ने आशंका पनि गरिएको छ । तर, तत्काल भने ती दुवै पत्रिका सुरु हुने छैनन् । साउन लागेपछि कान्तिपुर, काठमाडौंबाट देशभरका करिब एकसय पत्रकार र कर्मचारीलाई विदा गर्ने तयारी गरेको छ ।
त्यसरी विदा गर्ने सूचीमा भने अरुबेला पनि खासै काम नगर्ने र लामो समयसम्म काम गरेकाहरु पर्नेछन् । त्यसको सूची कान्तिपुर बनाईसकेको छ । तर, पत्रकार महासंघको आन्दोलनका कारण केही दिन लम्बिएको छ ।
त्यसो भए कान्तिपुरबाट मात्रै करिब डेढसय पत्रकार र कर्मचारीले जागिर गुमाउनेछन् कोरोनाका कारणले मात्रै । तर, त्यसरी जागिर घुमाउनेले रित्तो हात भने जानुपर्ने छैन ।
करारमा कार्यरतलाई ३ महिना र स्थायीलाई ६ महिनाको खाईपाई आएको सेवासुविधा अनुसार तलबभत्ता दिएको छ । कान्तिपुरले नेपाल र साप्ताहिकको टीमलाई भने सहज वातावरणमा विदा गरेको छ ।
नया“ पत्रिका दैनिक पनि पत्रकारको हविगत भएको बताइएको छ । नयाँ पत्रिकाले २०७७ जेठको तलब खुवाउन नै धौःधौ परेको थियो । संधै पहिलो हप्ता तलब दिने नयाँ पत्रिकाले जेठको तलब असारको तेस्रो हप्ता मात्रै दिएको थियो ।
असारको तलब खुवाउन भने झनै गाह्रो भइरहेको बताइन्छ । त्यसबाहेक नयाँ पत्रिकाले झन्डै ५० जनलाई विदामा राखेको खबर छ । भन्नलाई विदा भनिए पनि उनीहरुलाई जागिरबाट विदा नै गरिएको रुपमा पत्रकारहरुले बुझेका छन् ।
उनीहरुलाई आवश्यक परे बोलाइनेछ भन्दै विदा गरेको हो । उता, अन्नपूर्ण पोष्टले पनि ६ जना पत्रकारलाई अत्याचारपूर्वक दुर्गमस्थानमा सरुवा गरेको विषय चर्किरहेको छ । नेपाल पत्रकार महासंघले क्षेत्राधिकार नाघेर ६ जनाको पुनर्वहाली नगरे सम्पादक हटाउने धम्कीसहितको पत्र पठाएपछि थप विवाद चर्किएको छ ।
नेपाल पत्रकार महासंघसंग पटकपटक वार्ता भए पनि विवाद सल्टिएको छैन । आधा तलब दिंदै आएको अन्नपूर्ण पोष्टले २०७७ जेठको तलब साउन लाग्दासमेत दिन सकेको छैन । यता, नागरिकले हाल पत्रकार निकालेको त छैन तर तलब भने ३ महिना नाघ्दा पनि दिएको छैन । त्यसैगरी, हिमाल खबर पत्रिका पनि अब प्रकाशन नहुने भएको छ ।
हिमालको अनलाइन नयाँ साजसज्जामा आउने तयारी भने भइरहेको छ । २०७७ साउन १ गतेबाट भनिए पनि अब १५ भित्र नयाँ साजसञ्जामा ल्याउने तयारी भइरहेको छ । हिमालले पनि सर्कुलेशनका कर्मचारीलाई भने विदा गरेको छ । उनीहरुले पाउने सेवासुविधा अनुसार नै विदा गरेको छ ।
पत्रकारलाई भने हिमालले निकालेको छैन र तलब पनि रोकेको छैन । बरु यही बीचमा रामेश्वर बोहोरा र तुफान न्यौपानेलाई फिर्ता ल्याएको छ । साँघु
