- काठमाडौ,असार १३ गते सनिवार ।
प्रहरी चनाखो हुँदा लुटपाट गर्ने समूह आधा घन्टामै पक्राउ परेको छ । भक्तपुर चाँगुनारायण नगरपालिका वडा नं ४ स्थित आफ्नो बारीमा घाँस काटिरहेकी पार्वती गुरुङको गहना लुटपाट गर्ने समूह आधा घन्टामै पक्राउ परेको हो ।
घाँस काटिरहेकी गुरुङलाई चाँगुनारायण तर्फबाट आएका दुई जना युवकले एक्कासी खुकुरी देखाई उनले लगाएको गहना लुटी दिँउसो एक बजे फरार भएका थिए । उक्त सूचना प्राप्त गर्नासाथ महानगरीय प्रहरी प्रभाग, साँखुका प्रहरी निरीक्षक गोविन्द पन्थीले आफ्नो एरियामा चारैतर्फ प्रहरी परिचालन गरी भाग्न सक्ने स्थानलाई घेराबन्दी गरी लुटपाटमा संलग्न २ जनालाई पक्राउ गरेका छन् ।
सिन्धुपाल्चोक घर भई भक्तपुर सुर्यविनायक बस्दै आएका ३१ बर्षीय विशाल तामाङ र बर्ष ४८ का मंगल तामाङलाई घटना घटेको आधा घण्टामै पन्थी नेतृत्वको प्रहरी टोलीले पक्राउ गरेको छ । लुटेराको साथबाट पीडित पार्वती गुरुङले लगाएको ९९ लाल सुनको एक जोर गहना र लुट्दा प्रयोग गरेको खुकुरी समेत बरामद गरेको छ । लुटेराले गहना लुट्दा पीडित गुरुङको कान नै च्यातिएको छ ।
प्रहरी प्रभाग साँखुका प्रहरी निरीक्षक पन्थीले आफूहरुले घटनाको सूचना मेट्रो कन्ट्रोलबाट पाउनासाथ प्रहरी परिचालन गरी घेराबन्दी गरी लुटेरालाई पक्राउ गरेको र आवश्यक कारवाहीको लागि महानगरीय प्रहरी परिसर, भक्तपुर पठाइएको बताए । पक्राउ परेका लुटेराले लुटेपछि कपडा बदल्ने गरेको पाइएकाले उनीहरु ब्यवसायिक भएको र धेरै ठाउमा लुटपाटमा संलग्न हुनसक्ने आशंका पनि प्रहरीले गरेको छ ।
फेसबुकबाट तपाईको प्रतिक्रिया !