प्रहरीको दर्जनौं सुरक्षा घेरा पार गर्दै कसरी कोइला बोकेका ट्रक भक्तपुर आइपुग्नु

प्रकाशित मिति -२०७६ चैत २९ गते- भक्तपुर । कोइला बोकेका दर्जनभन्दा बढी ट्रक भक्तपुर भित्रिएका आइपुगेका छन्। पर्साको वीरगन्ज हुँदै आएका ती ट्रक गएराति भक्तपुरका विभिन्न इँटा भट्टामा आइपुगेका हुन्। ती ट्रकहरुमा खाद्यान्न र आल्मुनियम सल्फेट ढुवानी लेखिएको थियो ।

सरकारले लकडाउन गरेको समय अत्यावश्यक वस्तुमात्र ढुवानी गर्न पाउने व्यवस्था छ। तर कोइला भने अत्यावश्यक वस्तुमा पर्दैन। कोरोना भाइरसको जोखिम बढ्दै गएको समयमा इँटा व्यवसायीले भने खाद्यान्न र औषधिजन्य उद्योगलाई अत्यावश्यक वस्तु भन्दै कोइला ल्याएका हुन्। उनीहरुले सरकारले तोकेको न्यूनतम स्वास्थ्य मापदण्ड समेत पूरा गरेको देखिँदैन।

प्रहरीको दर्जनौं सुरक्षा घेरा पार गर्दै खाद्यान्न र आल्मुनियम सल्फेट ढुवानीको पत्र टाँसेका कोइला बोकेका ट्रक भक्तपुर आइपुग्नु रहस्यमय भएका छ । य
चाँगुनारायण नगरपालिका वडा नम्बर ८ र ९ सुडाल र ताहथलीमा रहेका विभिन्न इँटाभट्टामा ती ट्रक आइपुगेपछि कोरोना भाइरसको जोखिमलाई लिएर स्थानीय त्रसित बनेका छन्। त्यसको स्थानीयले विरोधसमेत जनाएका छन्।

स्थानीयको विरोधपछि चाँगुनारायण नगरपालिकाका नगरप्रमुख सोमप्रसाद मिश्र, भक्तपुर प्रहरी प्रमुख प्रहरी उपरिक्षक सविन प्रधान सुडाल पुगेका थिए। यसबारेमा प्रतिक्रिया दिँदैं नगरप्रमुख मिश्रले माथिल्लो तहदेखिको सेटिङमा वीरगन्जबाट कोइला बोकेका ट्रक चाँगुनारायण आएको बताए। 

सरकारको उच्च स्तरीय समितिको निर्णयमा नै त्रुटि भएको र इँटा उद्योगलाई अत्यावश्यक भन्ने बनाइएकोमा नगर प्रमुख मिश्रले असन्तुष्टि व्यक्त गरे। ‘मैले गृह मन्त्रालयका सचिव ज्यूसँग समेत गुनासो राखेको छु, गल्तीले उच्चस्तरीय समितिको बैठकमा इँटा उद्योग चलाउन दिने निर्णय घुसाइएको रहेछ’, नगरप्रमुख मिश्रले भने। 

महानगरिय प्रहरी परिसर भक्तपुरका प्रमुख प्रहरी उपरीक्षक सविन प्रधानले वीरगन्ज हुँदै ती ट्रकहरु भक्तपुर आइपुगे पनि केहीलाई भक्तपुर प्रवेश गर्ने नाकामा रोकिराखेको बताए। भक्तपुरमा ६२ वटा इँटाभट्टा सञ्चालनमा छन्। देशमा लकडाउन लागु भएर सबै व्यवसाय ठप्प भए पनि भक्तपुरका इँटाभट्टा भने निर्वाध सञ्चालन भइरहेका छन्।