काठमाण्डाै । अमेरिकी सहायक विदेशमन्त्री डोनाल्ड लुले नेकपा एमालेका अध्यक्ष एवम् पूर्वप्रधानमन्त्री केपी शर्मा ओलीसँग शिष्टाचार भेट गर्नुभएको छ । शुक्रवार अमेरिकी सहायक विदेशमन्त्री लुले ओलीसँग शिष्टाचार भेट गर्नुभएको हो ।
शिष्टाचार भेटमा मन्त्री लुले अमेरिकाले विभिन्न स्वास्थ्य, शिक्षा र रोजगारलगायतका क्षेत्रमा गरिरहेको सहयोगलाई अझै विस्तार गर्ने प्रतिबद्धता जनाउनुभएको नेकपा एमालेका विदेश विभाग प्रमुख डा. राजन भट्टराईले बताउनुभयो । उहाँले विदेशमन्त्री लुले अध्यक्ष ओलीसँग नेपालमा अमेरिकाले केही नयाँ क्षेत्र (क्लिन इनर्जी) मा पनि सहयोग गर्ने चासो दिएको बताउनुभयो ।
मन्त्री लुले एमसीसीको बारेमा राखेको प्रश्नको उत्तरमा अध्यक्ष ओलीले आफू सरकारमा नभएको बेलामा बोल्ने स्थिति नभएको भन्दै सरकारमा भएका दलहरूले गरेको निर्णय हेरेर आफ्नो निर्णय बनाउने बताउनुभयो ।
विभाग प्रमुख भट्टराईले भन्नुभयो, ‘संयुक्त राज्य अमेरिकाका सहायक विदेशमन्त्रीले पूर्वप्रधानमन्त्रीसँग शिष्टाचार भेट गर्नुभएको हो । भेटघाटका क्रममा विदेशमन्त्री लुले अमेरिकाले विभिन्न क्षेत्रमा सहयोग गरिरहेको छ, त्यो क्षेत्रलाई विस्तार गर्न चाहन्छौँ भन्नुभयो । पूर्वप्रधानमन्त्री ओलीले अमेरिकाले गरिरहेको सहयोगका लागि विदेशमन्त्री लुलाई धन्यवाद भन्नुभयो ।
त्यस्तै विदेशमन्त्री लुले एमसीसी के हुन्छ भनेर प्रश्न राख्नुभयो । यसबारेमा ओलीले हामी अहिले सरकारमा छैनौँ, सरकारमा नभएको बेलामा यही गर्ने भनेर बोल्ने स्थिति छैन, सरकारमा भएकाहरूले के गर्ने भन्छन्, त्यो हेरेर निर्णय गरौँ भन्नुभयो ।’
