- जनकपुरधाम , फागुन ११ गते मंगलवार ।।
- जनप्रभाव न्यूज
२ नम्बर प्रदेशका नवनियुक्त प्रदेश प्रमुख डा. राजेश झा ‘अहिराज’ ले सवारी दुर्घटनामा घाइते भएका ४ जना सर्वसाधारणको उद्धार गरेका छन्।
प्रदेश २ प्रमुख झाले आफ्नो पदीय हैसियतभन्दा मानवीयतालाई ख्याल गर्दै सडक दुर्घटनाका घाइतेको उद्धार गरेका हुन्। सुरक्षाका हिसाबले प्रदेश २ प्रमुखको प्रोटोकल महत्वपूर्ण मानिन्छ। तर उनले सुरक्षा प्रोटोकल तोड्दै नागरिकको उद्धारमा निस्किए।
जनकपुरधामबाट अगाडि पछाडि सुरक्षाकर्मीसहित गाडीमा सवार प्रमुख झाले मानवीयता देखाउँदै दुर्घटनाका घाइतेको उद्धार गरेपछि उनको प्रदेश भरी प्रशंसा भएको हो ।
जनकपुरधामबाट जीतपुर जाने क्रममा निजगढ जंगलमा सवारी दुर्घटनामा परेर छटपटाइरहेका ४ जना सर्वसाधारणको उद्धार गरी अहिराजले अस्पताल पुर्याएका हुन् । झाले यसलाई ‘नागरिकको सुरक्षा पहिलो जिम्मेवारी’ भनेका छन्।
उनले सवारी दुर्घटनामा परेको देखेपछि आफ्नो गाडी रोक्न लगाई घाइतेलाई आफू सवार गाडीमा राखेर चन्द्रनिगाहापुरको अस्पतालमा आफ्नो सुरक्षाकर्मीसहित पठाएका हुन् ।
यसअघि प्रदेश १ का मुख्यमन्त्री शेरधन राईले दुर्घटनाका घाइतेलाई उद्धार नगरि अगुवा पछुवा गाडीमा हुइँकिदा आलोचित भएका थिए। मोरङस्थित पूर्व-पश्चिम राजमार्गमा दुर्घटनामा परेकालाई बेवास्ता गर्दै मुख्यमन्त्री राई हिँडेका थिए।
फेसबुकबाट तपाईको प्रतिक्रिया !