- काठमाडौं ,असार १९ गते शुक्रबार ।
निकै तामझामका साथ शिलान्यास र उद्घाटन भयो– प्रहरी मुख्यालय हाताको अडिटोरियम हल । विवादास्पद आइजिपी सर्वेन्द्र खनालले अवकाशको दिन माघ २४ गते यो अडिटोरियम हलको उद्घाटन गरेको समाचार प्रहरीको समाचारकक्षले सार्वजनिक ग¥यो ।
अवकाश हुने दिन उनले नाम राख्नकै लागि मात्र अडिटोरियम हल सहित ५ वटा भवनको उद्घाटन गरेको कुरा विभिन्न छापाहरूमा समेत सार्वजनिक भइसकेको छ । केबल आफ्नो नाम राख्नकै लागि भवन सम्पन्न नहुँदा समेत उद्घाटन गर्नुले नामप्रतिको भोकोमात्र नभएर कति विक्षिप्त र लुब्ध छन् भन्ने कुरा पनि देखाउँछ ।
माघ २४ गते उद्घाटन गरिएको भवन अहिलेसम्म पनि सम्पन्न भइसकेको छैन । जबकि उनीपछिका आइजिपी ठाकुर ज्ञवाली पनि अवकाश हुँदैछन् । असार २४ गते ज्ञवाली अवकाश हुँदैछन् । उनी अवकाश हुँदासमेत सम्पन्न नभएको भवन खनालले शिलान्यास गर्दा के अवस्थामा थियो होला जोकोहीले पनि सहजै अनुमान गर्न सक्दछ । अहिले मुख्यालय जाने जोकोहीले पनि देख्न सक्दछ कि उद्घाटन भएको सो अडिटोरियम हलको अवस्था के छ भन्ने कुरा । त्यसो त यो भवन निर्माण प्रक्रियादेखि नै विभिन्न विवादमा मुछिँदै आएको छ ।
टेण्डर प्रक्रियादेखि नै यसमा भ्रष्टाचारका गन्धहरू धेरै सार्वजनिक भइसकेका छन् । ठूलो आर्थिक चलखेलका आधारमा ठेक्का प्रक्रिया दिएको कुरा सार्वजनिक भइसकेको छ । तर बिडम्बना यति विवाद र अनियमितताका बीच खनालले ५ महिना अगाडि उद्घाटन गरेको भवन अहिले पनि निर्माणाधीन त छँदैछ अझै यो सम्पन्न हुन ६ महिना लाग्ने कुरा प्राविधिक निर्देशनालयका इञ्जिनियरहरू नै बताउँछन् । आखिर एउटा शिलालेखमा नाम लेखाउनका लागि यति ठूलो हतार गर्नु कति लाचारीपन हो भन्ने कुरा पनि उजागर हुन्छ ।
