फाल्गुन, २५ गते ।
जनकपुरधाम : १५ दिने मिथिला माध्यमिकी परिक्रमा टोली जनकपुरधाम आइपुगेको छ । नेपाल–भारतका विभिन्न ठाउँको परिक्रमा गर्दै आज बिहान परिक्रमा टोली जनकपुधाम आइपुगेको हो ।
परिक्रमामा धनुषा, महोत्तरी र भारतको बिहारका सीमावर्ती क्षेत्रमा अवस्थित धार्मिक स्थलहरूको १ सय ७ किलोमिटर र सीमावर्ती क्षेत्र भारतको २६ किलोमिटर गरी १ सय ३३ किलोमिटर दूरी पैदल यात्रा गर्दै साधुसन्त तथा श्रद्धालुहरू जनकपुरधाम आइपुगेका छन् ।
परिक्रमामा सहभागी साधुसन्त तथा भक्तजनहरू जनकपुरधाममा आइबार विश्राम गरी सोमबार नगरको परिक्रमा गर्नेछन् । जनकपुरधाममा हुने परिक्रमालाई अन्तगृह परिक्रमा भनिन्छ । १५ दिने परिक्रमामा सहभागी हुन नसेकाहरू पनि छोटो दूरीको अन्तरगृह परिक्रमामा सहभागिता जनाउँछन् ।
फागुन ११ गते धनुषाको मिथिलाबिहारी नगरपालिकाको कचुरीस्थित मिथिला बिहारी मन्दिरबाट भगवान श्री सिताराम मिथिला विहारीको डोला निस्किएको थियो । परिक्रमा यात्राका क्रममा नेपालमा १३ तथा भारतमा २ गरी १५ विश्रामस्थल छन् ।
परिक्रमामा जनकपुरधामको हनुमानगढीबाट कल्याणेश्वर हुँदै फूलहर, मठिहानी, जलेश्वर, मडई, ध्रुवकुण्ड, कन्चनवन, पर्वत्ता, धनुषाधाम, सतोषर, औरही, करुणा, विषौल र पुनः कल्याणेश्वर पुगेर पुनः जनकपुर फर्किएर फागू पूर्णिमाका दिन नगरको पाँचकोशे अन्तर्गृह परिक्रमा गरी समाप्त हुन्छ ।
