कृष्णा यादव / बारा,असार ६ गते सनिवार ।

लकडाउन खुकुलो भएसँगै हरियो तरकारी र माछामासुको दरमा वृद्धि भएको छ । चैत ११ गतेदेखि सुरू भएको लकडाउनको करिब तीन महिना अवधिमा हरियो तरकारीको दर सस्तो भएको थियो ।

लकडाउनको सुरुवातमा हरियो तरकारी बोडी, घिरौंला, रामतोरीया, करैला, बन्दा, काउली, गोलभेंडा, खुर्सानी, परवल आदि रु १० देखि ३० प्रतिकिलो थियो। बाह्य जिल्ला र स्थानीय तहमा पनि एक ठाउँबाट अर्को ठाउँ जान नसक्दा हरियो तरकारी निकै सस्तो भएको थियो। पर्सा बारामा उत्पादित तरकारी बाहिर नजाँदा वीरगंजलगायत जिल्लाका ग्रामीण क्षेत्रमा पनि निकै सस्तो भएको थियो। असार १ गतेदेखि लकडाउन खुलेसँगै हरियो तरकारी महँगो हुँदैछ।

बाह्य जिल्ला र स्थानीय तहमा पनि एक ठाउँबाट अर्को ठाउँमा ढुवानी सहज भएको कारण हरियो तरकारी बाहिरिएपछि महँगो भएको हो। वीरगंज तरकारी तथा फलफूल व्यवसायी सङ्घका अध्यक्ष विदुर गुप्ताले ढुवानी सहज भएपछि तरकारी महँगो भएको बताएका छन। माछामासु महँगो लकडाउन सुरू भएपछि सस्तो भएको कुखुरा अहिले महँगो हुँदैछ।

लकडाउनको कारण माछामासु बिक्रीमा रोक लागेपछि पर्सामा रहेका करीब ५ सय कुखुरा फार्ममध्ये आधा बन्द भएका थिए। त्यसपछि बोइलर कुखुरा सस्तो भएको कारण थुप्रै फार्मले नयाँ चल्ला राखेनन्। जसको कारण अहिले उत्पादन थोरै भएपछि बोइलर कुखुरा महँगो भएको छ। लकडाउनताका जिउँदो रु २ सय र मासु रु २५० मा बिक्री हुने गरेको कुखुरा अहिले जिउँदो रु ३ सय र मासु रु ४४० मा बिक्री भइरहेको छ। कुखुरा व्यवसायी सङ्घ पर्साका अध्यक्ष फिरोज आलमले उत्पादनमा कमी आएको र माग बढी भएको कारण बोइलर कुखुरा महँगो भएको बताउनु भयो।

उनले अहिले दश प्रतिशत फार्म मात्र सञ्चालनमा रहेको र तिनीहरूबाट उत्पादित बोइलर कुखुरा बजारमा माग अनुसार आपूर्ति हुन नसक्दा मूल्य बढेको बताउनु भयो। यसैगरी, खसीको मासुको पनि मूल्य बढेको छ। वीरगंज महानगरमा प्रतिकिलो रु ९ सय तोकिएको खसीको मासु लकडाउनदेखि नै हजार रुपैयाँ पुगेको थियो। अहिले पनि सोही दाममा बिक्री भइरहेको छ। माछामासु व्यवसायी सङ्घका सचिव ग्यासुमियाँ देवानले सङ्घले तोकेको दर रु ९ सय प्रतिकिलो रहेको तर बजारमा रु १ हजारसम्म बिक्री भइरहेको बताए।

उनले अहिले पनि ढुवानी सहज नभएकोले बाहिरबाट खसी ल्याउन नसक्दा महँगो भएको बताएका छन। पर्सा जिल्लाका गाउँटोलमा भएका खसीहरू महँगो मूल्यमा खरीद गर्नुपर्ने बाध्यकारी अवस्था भएकोले मासु महँगो भएको उनको तर्क छ। वीरगंज महानगरमा प्रतिकिलो रु १ हजारमा बिक्री भइरहेको खसीको मासु ग्रामीण क्षेत्रमा प्रतिकिलो रु ८ सयमा बिक्री भइरहेको छ। ग्रामीण क्षेत्रमा पानी मिसाएको मासु प्रतिकिलो रु ७ सय र पानी नमिसाएको प्रतिकिलो रु ८ सयमा बिक्री भइरहेको छ। अहिले ग्रामीण क्षेत्रमा पनि बोइलर कुखुराबाहेक खसीको मासु खुलारूपमा बिक्री भइरहेको छैन। लकडाउनको समयदेखि खसीको मासु गाउँटोलमा भाग लगाएर बिक्री हुने प्रचलन अहिले पनि कायम छ I