काठमाडौं । नेपाली कांग्रेसले सहकारी ठगी प्रकरणमा संसदीय छानविन समिति नबनेसम्म संसद् चल्न नदिने बताएको छ । आज (मंगलबार) सभामुख देवराज घिमिरेले आह्वान गरेको बैठकमा सहभागी भएर बाहिरिँदै गर्दा कांग्रेसका प्रमुख सचेतक रमेश लेखकले सञ्चारकर्मीसँग कुराकानी गर्दै उपप्रधान एवं गृहमन्त्री रवि लामिछाने सहकारी ठगी प्रकरणमा मुछिएको विषयमा छानविन समिति बन्न आवश्यक रहेको बताए ।
उपप्रधान एवं गृहमन्त्री लामिछानेको नाममा कुनै पनि प्रक्रिया पूरा नगरी सहकारीबाट ऋण प्रवाह भएको भनी सरकारी वकिलको कार्यालय रुपन्देहीले तयार पारेको प्रतिवेदनमा उल्लेख गरेको उनले बताए । सरकारले सहकारी पीडितहरुको विषयलाई गम्भीरतापूर्वक नलिएर राज्यका विभिन्न संयन्त्रहरुलाई दुरुपयोग गर्नेसम्मको काम भएको उनले आशंका व्यक्त गरे । रवि लामिछानेको नामबाट एक ठाउँमा नभएर ठाउँ–ठाउँमा सहकारीको रकम अपचलन भएको उनले बताए ।
उनले सरकारले अरु सबै कुरामा छानविन समिति बनाउन तदारुकता देखाएपनि गृहमन्त्री लामिछाने संलग्न रहेको सहकारी ठगी प्रकरणमा पन्छिन खोजेको बताए । उनले गृहमन्त्री लामिछाने कानुनभन्दा पनि माथिको व्यक्ति हो र ? भन्दै प्रश्नसमेत गरे ।
‘एक जना माननीय गृहमन्त्रीजीको बारेमा प्रश्न उठ्ने ? अनि त्यसलाई सम्बोधन नगर्ने ? व्यक्ति होईन नि । देशको उपप्रधानमन्त्री एउटा व्यक्तिमात्रै हो ? अरु सबै कुरामा गर्ने रे, उपप्रधानमन्त्री, माननीय गृहमन्त्रीको बारेमा प्रश्न उठ्दा नगर्ने रे ? त्यसो भए कोही मानिस यो देशमा संविधान, कानुनभन्दा माथि छ ?’ उनले भने ।
