सिरहा, जेठ २७ गते । सिरहा जिल्लाको विभिन्न स्थानबाट कोराना भाइरस संक्रमण भई कोभिड अस्पतालमा ल्याइएका २० जना कोरोना संक्रमणमुक्त भएपछि उनीहरुलाई आज मङ्गलबार विदा गरिएको छ । त्यसैगरी, क्वारेन्टाइनमै रहेका थप १२ जना संक्रमित भएको पुष्टि भएपछि उनीहरुलाई कोभिड अस्पताल धनगढीमा भित्र्याइएको छ ।
धनगढीमाई नगरपालिकाको छपरारीमा रहेको महेन्द्र गेनाई कोभिड अस्पतालमा उपचाररत २० जना विरामी संक्रमणमुक्त भएपछि उनीहरुलाई प्रमुख जिल्ला अधिकारी सरोजप्रसाद गुरागाई, प्रमुख सेनानी जितेन्द्र गौली, राष्ट्रिय अनुसंधान जिल्ला कार्यालय सिरहाका प्रमुख उप-अनुसंधान निर्देशक रमेश चन्द्र यादव , प्रहरी उपरिक्षक उमाप्रसाद चतुर्वेदीले पुष्पगुच्छा तथा हाललाई संक्रमणमुक्तको प्रमाणपत्र दिएर विदाई गर्नुभएको थियो ।
उक्त अस्पतालमा भर्ना भई निको हुनेहरुमा गत जेठ ३ गते पिसिआर पोजिटिभ पाइएका सिरहाको पहिलो संक्रमित लतियाहीका युवादेखि गत जेठ १७ गते भर्ना भएकाहरुसम्म थिए । भर्ना भएका सबैलाई तेश्रो चरणको परिक्षणपश्चात विदाई गरिएको हो ।
विदाईपछि उनीहरुले अझ १४ दिन होम क्वारेन्टाइनमा बस्नु पर्ने सिरहाका प्रमुख जिल्ला अधिकारी गुरागाईले जानकारी दिए । संक्रमित भएपछि अस्पतालमा बसी मङ्गलबार विदाई पाउनेहरुले आफूहरुले समाजबाट अलग भई आइसोलेसनमा बसेर उपचार गराउँदा कुनै अफ्ठ्यारो नभएको बताउनुभयो ।
यसैगरी, राष्ट्रिय जनस्वास्थ्य प्रयोगशाला टेकुमा गरिएको परिक्षणबाट सिरहाका १२ जनामा कोरोना संक्रमण भएको पुष्टि भएको छ । संक्रमण पुष्टि हुनेहरुमा सिरहा क्वारेन्टाइनका १० जना, सुखिपुर क्वारेन्टाइनका एक जना तथा बरियारपट्टी क्वारेन्टाइनका एक जना रहेको प्रजिअ गुरागाईंले जानकारी दिनुभयो । उनीहरु सबैलाई उपचारका लागि मङ्गलबार नै महेन्द्र गेनाई कोभिड अस्पतालमा ल्याइएको बताइएको छ । यो सँगै सिरहा जिल्लामा कोरोना संक्रमण हुनेको सँख्या ६२ पुगेको छ ।
