काठमाडौैं । करिब नौ करोड रुपैयाँ अकुत सम्पत्ति आर्जन गरेको अभियोग लागेका मालपोत कार्यालयका कार्यालय सहयोगीलाई विशेष अदालतले सफाइ दिएको छ । मालपोत कार्यालय चाबहिलका तत्कालीन कार्यालय सहयोगी राजेन्द्र बस्नेतलाई आइतबार विशेष अदालतले सफाइ दिएको हो ।

अख्तियार दुरुपयोग अनुसन्धान आयोगले आठ करोड ९८ लाख ५८ हजार ६ सय १३ रुपैयाँबराबरको सम्पत्तिको स्रोत नखुलेको भनी चार वर्षअघि उनीविरुद्ध मुद्दा दायर गरेको थियो । जसमा विशेष प्रमाण नपुगेको दाबी गर्दै बस्नेतलाई अदालतले सफाइ दिएको हो । बस्नेत १९ कात्तिक ०४५ मा सार्वजनिक सेवामा प्रवेश गरेका थिए ।

०७५ असारसम्मको उनको सम्पत्तिको अख्तियारले विश्लेषण गरेको थियो । उनले श्रीमती सीता बस्नेतको नाममा ६ करोड ७४ लाखबराबरको घरजग्गा खरिद गरेका थिए । आमा टुकुकुमारी बस्नेतको नाममा रहेको जग्गामा घर बनाएको खुलेको थियो ।

ऋण तिर्न ३९ लाख ७६ हजार, गाडी खरिदमा ३७ लाख ३१ हजार तथा बिमामा पाँच लाख ७० हजार खर्च गरेका थिए । साथै, उनीसँग स्रोत नखुलेको ११ लाख पनि अख्तियारले बरामद गरेको थियो ।

भतिजी कृपा बस्नेतलाई एक करोड लगानी गरेको दाबीसहित आयोगले आमा, श्रीमती र भतिजीलाई समेत प्रतिवादी बनाएर मुद्दा दायर गरेको थियो । विशेष अदालतका अध्यक्ष टेकनारायण कुँवर तथा सदस्यहरू रामबहादुर थापा र मुरारीबाबु श्रेष्ठको इजलासले सफाइ दिएको हो ।

चाबहिल मालपोत कार्यालयमा लामो समय काम गरेका बस्नेतलाई अख्तियारले त्यसवेला पक्राउ गरी सुरुमा राजस्व हिनामिनाको मुद्दा दायर गरेको थियो । थप अनुसन्धानका क्रममा उनीसँग अकुत सम्पत्ति भेटिएको अख्तियारको दाबी थियो ।