सिरहा,जेठ २५ गते आइतबार ।
जनताको मतदानबाट बहुमत प्राप्त गरेको सरकारले जनता र किसान विरोधी बजेट ल्याएको प्रतिनिधिसभा सदस्य एवम् नेपाली काँग्रेस कोषाध्यक्ष सितादेवी यादवले बताएकी छन् ।
कोरोना संक्रमणले विश्वभर पैल्दो महामारीको चपेटामा देश फस्दै गएपनि संक्रमणको प्रभाव रोक्न उचित बजेट छुट्याउनुको साटो पुरानै ढाँचामा पार्टीको कार्यकर्ता पाल्ने गरी बजेट ल्याएको उनको आरोप छ । रोग र भोकबाट जनतालाई बचाउन प्रभावकारी कदम चाल्न उनले जोडदार माग गरिन् ।
संसदिय पूर्वाधार विकास कार्यक्रममा पार्टीको लेटर प्याड प्रयोग गरेर उपभोक्ता समितिको लागि नाउँ सिफारिस गर्नु भ्रष्टाचार गर्ने नियत देखिएको उनले तर्क गर्दै भनिन्,‘त्यस्ता कार्यले विकास भन्दा कार्यकर्ता पाल्ने काम मात्र हुने छन् ।’ बहुमतको बलमा जस्तोसुक्कै काम भइहाल्छ भन्ने गलत सोच भएकोले त्यस्ता कार्य अबिलम्ब रोक्नुपर्ने उनको माग छ ।
वर्तमान सरकारले बजेट, नीति तथा कार्यक्रम तेश्रो पल्ट प्रस्तुत गरेपनि जनहित, समावेशी, किसानमुखी, विपन्न वर्गको हित भन्दा कार्यकर्ताको पक्षमा बढि बजेट छुट्याएको देखिएको उनको दाबी छ । ‘शान्ति मन्त्रालय गृहमा मर्ज भएको अर्थमन्त्रीलाई थाहा भएकै कुरा हो । विगतका मन्त्रालयबाट भए गरेको सम्पूर्ण कामको जिम्मेवारी गृहमा गएको छ,’ उनी भनिन्, ‘शान्ति मन्त्रालयबाट विगतमा सम्पन्न भएका कामको करोडौं रकम भुक्तानी दिन बाँकी छ । सो भुक्तानीको लागि पटक पटक कुरा उठाउदा वेवास्ता गर्नुको कारण के ?’
कृषि प्रधान देश भनेर मात्र हुँदैन् उनले भनिन्,‘खेती किसानी गर्ने समय आउदै छ । किसानका लागि मल, बीउ र सिचाईको लागि उचित प्रवन्ध गरिएको देखिदैन् ।’ गरिबी निवारण कोषमा १९ अर्ब रुपैयाँ थन्किएको उनले दाबी गर्दै भने,‘सो पैसा कसको हो, त्यो रकम कोरोना महामारीको यो बेलामा किसानको हितमा खर्च गर्न कसले रोकेको छ ?’ प्रधानमन्त्री आधुनीकरीकरण र राष्ट्रपति महिला उत्थान योजनाको रकमलाई समेत कोरोना संक्रमण रोक्न र किसानको हितमा केन्द्रित गर्न उनको आग्रह छ ।
बजेट विनियोजनको सन्दर्भमा प्रदेश नं.२ सँग सरकारले दुईरंगा व्यवहार गरेको उनले ठोकुवा गर्दै त्यस्ता कार्यलाई बेलैमा सच्चयाएर प्रदेश नं.२ लाई आर्थिक रुपले समान व्यवहार गर्न आग्रह गरिन् । प्रस्तुत बजेटमा द्धन्द्वपिडितका लागि प्रभावकारी कार्यक्रम नभएको भन्दै उनले चिन्ता व्यक्त गरिन् ।
हरेक वर्ष जस्तै बर्षात महिनामा कमलाको बाढीले सिरहा र धनुषाको केही क्षेत्रमा तवाही हुन सक्ने अवस्था कामयमै रहेकोले कमला नदिलाई नियन्त्रण तथा व्यवस्थापनका लागि उचित बजेटको व्यवस्था गर्न माग गरिन् । रोगबाट लड्दै रोजगारी सृजना हुने गरी प्रभावकारी बजेट तथा नीति ल्याउन उनले माग गरेकी छन् ।
