काठमाडौं,जेठ २३ गते शुक्रबार ।
कोरोनाको संक्रमणबाट ११ जनाको मृत्यु भएको र थप २७८ जनामा कोरोना संक्रमण, संक्रमितको संख्या २ हजार ९ सय १२ पुगेपछि स्वास्थ्य तथा जनसंख्या मन्त्रालयले मुलुकमा जनस्वास्थ्य विपद् घोषणाका लागि आवश्यक गृहकार्य गरेको छ ।
मन्त्रिपरिषद्ले प्रस्ताव स्वीकृत गरेपछि मुलुकमा आपतकाल लागू हुनेछ ।
आपतकालको आदेश जारी भएपछि अत्यावश्यक सामग्री खरिदमा सार्वजनिक खरिद प्रक्रिया अवलम्बन गर्नुपर्ने बाध्यता हुने छैन । सरकारले निजी क्षेत्रको अस्पताल र अरू सम्पत्ति आफूले चाहेअनुसार परिचालन गर्न घोषणाबाट मद्दत पुग्नेछ ।
स्वास्थ्य मन्त्रालयले विपद् घोषणाका लागि प्रस्ताव मन्त्रिपरिषद् बैठकमा पेश गर्ने जनाएको छ । जनस्वास्थ्य विपद्को प्रस्ताव मन्त्रिपरिषद् बैठकमा लैजाने निर्णय गरिएको स्वास्थ्य तथा जनसंख्या मन्त्रालयका प्रवक्ता डा. विकास देवकोटाले जानकारी दिए ।
‘संक्रमितका साथै मृत्यु हुनेको संख्या पनि बढिरहेकाले पब्लिक हेल्थ इमरजेन्सी घोषणाको प्रस्ताव पारित गर्न मन्त्रिपरिषद्मा लैजाने निर्णय भएको छ,’ उनले भने ।
एकभन्दा बढी प्रदेशमा कुनै विपद् सिर्जना हुन गएमा सरकारले जनस्वास्थ्य विपद् घोषणा गर्न सक्ने कानूनी व्यवस्था छ । कोरोनासँग सम्बन्धित हेल्थ सेक्टरको इमरजेन्सी रेस्पोन्स प्लानअन्तर्गत २ हजारभन्दा बढी सक्रिय संक्रमित भए पब्लिक हेल्थ इमरजेन्सी घोषणा गर्न सकिने प्रावधान रहेको डा. देवकोटाले बताए ।
उनले भने, ‘संक्रमितको संख्या बढिरहेको अवस्था र मृत्युको खबर पनि नचाहँदा नचाहँदै बढिरहेका बेला हेल्थ सेक्टरको इमरजेन्सी रेस्पोन्स प्लान बनाएका थियौं । जो कोरोना पाण्डेमिकसँग सम्बन्धित थियो। त्यसमा कोभिड हेल्थ इमरजेन्सी घोषणा गर्न सकिने व्यवस्था राखिएकाले त्यहीअनुरूप छलफल चलाइएको थियो । त्यसका लागि मन्त्रिपरिषद्बाट स्वीकृत हुनका लागि प्रस्ताव लैजाने निर्णय गरेका छौं । प्रस्ताव जाँदैछ । स्वीकृति भइसकेको छैन ।’
विपतको घोषणा गर्दा एक जना उच्च तहका अधिकारी तोक्नुपर्ने प्रावधान छ । त्यसका लागि मन्त्रालयले स्वास्थ्य सचिवलाई तोकेको छ ।
आपतकालीन अवस्थामा तत्कालै स्वास्थ्य सेवा पुर्याउन दु्रत प्रतिकार्य टोली तथा आपतकालीन चिकित्सकीय समूह रहनेछ । संघ, प्रदेश र स्थानीय तहले आपतकालीन स्वास्थ्य योजना विकास गरी लागू गर्नुपर्ने जनस्वास्थ्य सेवा ऐनमा उल्लेख छ ।
मुलुकका ७ वटै प्रदेशका ६५ जिल्लामा कोरोना संक्रमण फैलिसकेको छ । मन्त्रालयका प्रवक्ता डा. देवकोटाका अनुसार हालसम्म संक्रमितको संख्या २ हजार ६ सय ३४ पुगेको छ । जसमध्ये पुरुष २ हजार २ सय ५० जना छन् । संक्रमित महिलाको संख्या १ सय ८४ छ । आजको अन्नपूर्ण पोस्ट दैनिकमा समाचार छ ।
बिहीवार मात्र मुलुकमा थप ३ सय ३४ जना कोरोना भाइरसका नयाँ संक्रमित भेटिएका छन् । एकैदिन यति ठूलो संख्यामा संक्रमित फेला परेको पहिलो पटक हो ।
कोरोना संक्रमणबाट ३ हप्ताभित्र १० जनाको मृत्यु भएको छ । भारतबाट ५ दिनअघि स्वदेश फर्केका पाल्पाको पूर्वखोला गाउँपालिका निवासी ४५ वर्षीय पुरुषको ज्यान गएको छ ।
