रुपन्देही । रुपन्देहीमा प्रहरीले १० लाख ९० हजार रूपैयाँ लुट्ने दुई जनालाई पक्राउ गरेको छ । जिल्लाको लुम्बिनी सांस्कृतिक नगरपालिका– ६, महिलावारस्थित लुम्बिनी रेमिट एण्ड कम्युनिकेशनका कर्मचारीको साथबाट १० लाख ९० हजार लुटेर भागेका दुई जनालाई पक्राउ गरेको प्रहरीले जनाएको छ ।
पक्राउ पर्नेहरूमा भारत उत्तर प्रदेशको भगवानपुर बस्ने वर्ष २८ का सुनील कुमार सहानी र गोरखपुर थाना रिठुअखओर बस्ने वर्ष २६ को शशिकांत भट्ट रहेको जिल्ला प्रहरी कार्यालयले जनाएको छ ।
डीएसपी श्यामु अर्यालले उनीहरूको साथबाट सुन्मिका इण्डस्ट्रियल लेखेको सेमी अटोमेटिक पेस्तोल एक थान, म्याग्जिन एक थान, ५ थान गोली, कटुवा पेस्तोल एक थान, युपी ५८ भी १८१४ नम्बरको भारतीय नम्बरको मोटरसाइकल, मोबाइल एक थान बरामद भएको बताए ।
