काठमाडौं । स्वास्थ्य तथा जनसंख्या मन्त्रालयअन्तर्गतको स्वास्थ्य सेवा विभागले व्यवसायीसँगको मिलेमतोमा ४१ करोड रुपैयाँभन्दा बढी रकम तिरेर सात वटा स्वास्थ्य उपकरण खरिद गर्ने तयारी गरेको छ । मन्त्रालयको उच्च स्रोतका अनुसार विभागको आपूर्ति महाशाखाले खरिद गर्ने तयारी गरेका ती सात किसिमका उपकरणको कम्पनी मूल्य ३२ करोड रुपैयाँ हाराहारीमा पर्छ । तर विभागले व्यवसायीहरूको मिलोमतोमा ७३ करोड रुपैयाँमा ती उपकरण खरिद गर्ने चाँजोपाँजो मिलाएको हो ।
स्रोतका अनुसार लुम्बिनी हेल्थ केयर र यसका अन्य सहयोगी कम्पनीलाई मिल्नेगरी ती स्वास्थ्य उपकरण खरिद गर्न स्पेसिफिकेसन तयार गरिएको थियो । विभागले निकालेको टेन्डर लुम्बिनी र यिनै अन्य सहयोगी कम्पनीहरूले पाएका छन् । स्वास्थ्य उपकरण खरिद गर्न अहिले एलसीसमेत खोलिएको छ । दक्षिण कोरिया र चीनबाट सामान खरिदका लागि एलसी खोलिएको हो । विभागले १७८ थान पोर्टेबल अल्ट्रासाउन्ड, नौ थान डिआर एक्सरे, १३ थान फ्लाट पानर डिटेक्टर एक्सरे, १३० थान हेमोडाइलोसिस्ट मेसिन, १ हजार थान पल्स अक्सिमिटर र १ हजार थान बिपी सेट खरिद गर्दैछ ।
आपूर्ति शाखा प्रमुखले आफूले चाहेअनुसारको कम्पनीलाई ठेक्का पार्नेगरी स्पेसिफिकेसन बनाउन बायोमेड इन्जिनियर करारमा राखेको स्रोतको दाबी छ । हाल आपूर्ति शाखा प्रमुखमा डा. सुरेन्द्र चौरसिया छन् । यसअघि पनि विभागले ल्याउने अधिकांश सामग्रीमा लुम्बिनी हेल्थ केयर र यसका सहयोगी संस्थाहरूले टेन्डर पाउने गरेका छन् ।
दक्षिण कोरिया र चीनबाट सामान खरिदका लागि एलसी खोलिएको हो । विभागले १७८ थान पोर्टेबल अल्ट्रसाउन्ड, नौ थान डिआर एक्सरे, १३ थान फ्लाट पानर डिटेक्टर एक्सरे, १३० थान हेमोडाइलोसिस्ट मेसिन, १ हजार थान पल्स अक्सिमिटर र १ हजार थान बिपी सेट खरिद गर्दैछ ।
विभागले कम्पनी मूल्यको दोब्बरभन्दा बढी पैसा तिरेर स्वास्थ्य उपकरण किन्ने तयारी गरेको सूचना स्वास्थ्य तथा जनसंख्या राज्यमन्त्री हीराचन्द्र केसीसमक्ष पुगेपछि उनले त्यसबारे चासो देखाएका छन् । ‘मैले यसअघिको खरिद प्रकरणमा चासो देखाएको थिएँ । पछिल्लो खरिदबारे बुझ्न पाएको छैन । तपाईंले भनेजस्तै मूल्यमा ४१ करोडको फरक रहेछ भने छानबिन गरिनेछ,’ नागरिकसँग शनिबार राज्यमन्त्री केसीले भने ।
स्वास्थ्य उपकरण खरिदबारे मन्त्रालयका तर्फबाट पनि सूक्ष्म अध्ययन गरिने उनले जानकारी दिए । ‘मन्त्रालयले अनियमितताबारे अध्ययन थाल्छ । दोषी ठहरिनेमाथि कानुनबमोजिम कारबाही हुन्छ,’ उनले भने । स्रोतका अनुसार पछिल्लो स्वास्थ्य सामग्री खरिदमा ४१ करोडभन्दा बढी अनियमितता गर्न खोजिएपछि स्वास्थ्य राज्यमन्त्री केसीले आपूर्ति शाखा प्रमुख डा. चौरसियालाई स्पष्टीकरणसमेत मागेका थिए । यही विषयमा नेकपा एकीकृत समाजवादीका सम्मानित नेता झलनाथ खनालले पनि चासो दिएको बताइएको छ ।
