कमाण्डमा लापरबाही गर्ने जिल्ला इन्चार्जलाई पनि प्रहरी महानिरीक्षक ( आईजीपी ) धिरज प्रताप सिंहले निगरानीमा राखेको छ ।
काठमाडौं । कमाण्डमा कमजोर देखिएका जिल्ला प्रहरी कार्यालय अछामका प्रमुख प्रहरी नायव उपरीक्षक ( डिएसपी ) रविराज थपलियालाई प्रहरी प्रधान कार्यालयले हटाएको छ । थपलियालाई जिल्ला इन्चार्जको जिम्मेवारीबाट हटाएर डिएसपी नारायण डाँगीलाई पठाइएको छ । डिएसपी डाँगी प्रदेश प्रहरी कार्यालय सुर्खेतमा कार्यरत थिए ।
पञ्चदेवल विनायक नगरपालिका–४ का युवक विनोद शाहीको मृत्युपछि अछाम अशान्त बन्दै आएको छ । भिरबाट लडेको अवस्थामा उनको शव गत २१ जेठमा भेटिएको थियो । परिवारले उनको हत्या भएको आरोप लगाउँदै आएको छ ।
घटनाको अनुसन्धानमा केन्द्रीय अनुसन्धान ब्यूरो(सिआइबी)बाट टोली खटिएको छ ।
तीन साता हुन लाग्दा पनि घटनाको अनुसन्धान टुंगिएको छैन । डिएपी थपलियाले राम्रो काम गर्न नसक्दा स्थानीय प्रहरीमाथि आक्रोशित बनेका थिए । कमाण्ड राम्रो नभएको आधारमा डिएसपी थपलियालाई हटाएर डाँगीलाई पठाइएको प्रहरी प्रधान कार्यालयले जनाएको छ । थपलियाको काठमाडौं उपत्यका प्रहरी कार्यालयमा सरुवा भएको छ ।
कमाण्डमा लापरबाही गर्ने जिल्ला इन्चार्जलाई पनि प्रहरी महानिरीक्षक ( आईजीपी ) धिरज प्रताप सिंहले निगरानीमा राखेको छ ।
