काठमाडौं । खल्ती एप्सको ‘कर्मचारी हुँ’ भन्दै ठगी गरेको आरोपमा महानगरीय अपराध महाशाखाले दुईजना किशोरलाई पक्राउ गरेको छ । पक्राउ पर्नेमा पर्साको छिपहरमाई गाउँपालिका वडा नम्बर–२ घर भएका १८ वर्षका निरञ्जन कुमार गुप्ता र १८ वर्षीय करण यादव छन् ।जिल्ला प्रहरी कार्यालय पर्सासँग समन्वय गरेर उनिहरुलाई पुस ३० मा पक्राउ गरेर काठमाडौं ल्याएको महानगरीय अपराध महाशाखाका एसएसपी बसन्त कुँवरले बताए ।
आरोपीहरुले खल्ती एप्स प्रयोगकर्तालाई फोन गरेर ‘म खल्ती एप्सको कर्मचारी हुँ, तपाईको खल्ती खाता नवीकरण गर्नुपर्ने रहेछ’ भन्थे । पीडितलाई विश्वासमा लिएर मोबाइल नम्बरमा आउने ओटिपी कोड ‘कसैलाई नदिई टिपाउनुहोला’ भनेर उनीहरुले कोड लिने गरेका थिए । सो कोड पाएपछि पीडितको खातामा प्रवेश गरेर त्यहाँ भएको रकम विभिन्न व्यक्तिहरुको बैंक खातामा ट्रान्सफर गर्ने गरेको प्रहरीको अनुसन्धानबाट थाहा भएको छ ।
निरञ्जन र कणको समूहले अहिलेसम्म ४ जनाको खातामा प्रवेश गरेर २ लाख रुपैयाँ ठगेको भेटिएको एसएसपी कुँवरले बताए । लुटमा संलग्न अरु दुईजना फरार छन् । उनीहरुले मोवाइल नम्बर ९८४८३९६४९२ बाट फोन सम्पर्क गर्ने गरेका थिए । आरोपीहरुलाई ठगी मुद्दामा कारवाहीका लागी महानगरीय प्रहरी परिसर काठमाडौंमा पठाइएको छ ।
