जनकपुर । सर्लाही प्रहरीले फरार सूचीमा रहेका अभियुक्तको खोजी तीव्र पारेको छ ।अदालतबाट बिभिन्न मुद्दामा कैद तथा जरिबानाको फैसला भई फरार रहेका अभियुक्तको खोजी कार्यलाई व्यापक बनाइएको सर्लाहीका प्रहरी उपरीक्षक (एसपी) कृष्ण प्रसाईले बताए । उनले गएको एक महिनाको अवधिमा जिल्लाभरबाट ३२÷३३ जना फरार अभियुक्त पक्राउ परिसकेका जनाए ।

गएको कात्तिक ८ गते जिल्ला प्रहरी कार्यालय सर्लाहीमा हाजिर भएका एसपी प्रसाईले यहाँ आएपछि फरार अभियुक्त पक्राउ गर्न अभियानै सञ्चालन गरेका छन् । सोहीक्रममा सिन्धुली जिल्ला अदालतमा ठगी मुद्दा खेपिरहेका सर्लाहीको लालबन्दी नगरपालिका–१७, रानिगञ्जका ३५ वर्षीय जनक पौडेललाई सर्लाही प्रहरीले शुक्रबार पक्राउ गरेको छ ।

उनीविरुद्ध गत पुस १७ गते पक्राउ पुर्जी जारी भएको थियो । हाल ईलाका प्रहरी कार्यालय लालबन्दीमा राखिएको उनलाई सिन्धुली प्रहरीलाई जिम्मा लगाइने जिल्ला प्रहरी कार्यालय सर्लाहीले जनाएको छ ।

यस्तै, बिहिवार जिल्लाको पर्सा गाउँपालिकाबाट २२ वर्षदेखि फरार रहेका एक अभियुक्त पक्राउ परेका छन् । चोरी मुद्दामा सर्लाही जिल्ला अदालतबाट २०५६ साल असार २२ गते एक महिना कैद र ३५ हजार रुपियाँ जरिवानाको फैसला भएपछि फरार भएका पर्सा गाउँपालिका–१, निवासी मुनिया भन्ने कलम हुसैन लुकिछिपी बसिरहेको अवस्थामा गाउँबाटै पक्राउ परेका हुन् ।

हुसैनलाई अदालतको आदेशानुसार सिन्धुली कारागार चलान गरिएको सर्लाही प्रहरीका प्रवक्ता एवं प्रहरी नायब उपरीक्षक (डीएसपी) माधव प्रसाद बुढाथोकीले जानकारी दिए ।