आलोक यादव / लहान । सिरहा प्रहरीले विगतमा चाडपर्वका बेला भएका अपराधिक गतिविधी र यस वर्ष हुन सक्ने सम्भावित घटनाको विश्लेषण गर्दै शंकास्पद व्यक्तिमाथि निगरानी बढाएको छ । तिहारसंगै टोलटोलमा प्रहरी परिचालन गर्दै सिरहाको लहान , मिर्चैया र गोलबजार लगायत को सुरक्षा व्यवस्था कडा पारेर लगिएको छ ।
शंकास्पद गतिविधी गर्ने, चोरी, लुटपाट, डकैती लगायतका अपराध गर्न खोज्ने, मापसे (मादक पदार्थ सेवन) गरेर होहल्ला एवं शान्ति सुरक्षाको अवस्था भड्काउन खोज्नेमाथि विशेष ढंगले निगरानी बढाइएको सिरहा प्रहरी प्रमुख एसपी हिरा बहादुर पाण्डेले जानकारी दिए । सार्वजनिक स्थलमा हुने गतिविधीको निगरानी गर्न प्रहरीको विशेष टोली खटिएको छ ।
चाडपर्वका बेला अपराध गर्ने एवं अवैध तरिकाले लाभ उठाउन खोज्ने प्रयास कसैले गरेको पाइएमा तत्काल नियन्त्रणमा लिएर कारबाही अघि बढाइने उनको भनाइ छ । चाडपर्वका बेला हुनसक्ने अपराधिक घटना नियन्त्रण गर्न र सुरक्षा व्यवस्था कडा पार्न परिचालित प्रहरीको नेतृत्व एसपी पाण्डेले आफैले गरेका छन् । उनले कुनै पनि शंकास्पद गतिविधी कोहीकसैले गरेको पाइएमा तत्काल प्रहरीलाई जानकारी पनि आग्रह गरेका छन् ।
उनले आर्थिक गतिविधी धेरै हुने ठाउँदेखि लिएर महत्वपूर्ण प्रतिष्ठानहरु तथा सार्वजनिक स्थलमा प्रहरी उपस्थिति बढाएर सुरक्षा व्यवस्था कडा पारिएको जनाए । एसपी पाण्डेले कुनै पनि अपराधिक घटना हुन नदिने हिसाबमा प्रहरी अघि बढेको जनाए । सार्वजनिक स्थल र पसलहरुमा २४ घण्टानै प्रहरीले सुरक्षा व्यवस्था चुस्त पारेको छ । त्यस्तै होटल, मदिरा पसल एवं सार्वजनिक सवारी साधन चेकजाँचलाई प्रहरी तीव्र पारेको छ । जसरी भए पनि चाडपर्व सुरक्षित, मर्यादित र व्यवस्थित बनाउने प्रयोगको उदेश्य रहेको उनले स्पष्ट पारे । कोरोना संक्रमण तीव्र रुपमा बढिरहेका बेला सुरु भएका चाडपर्वलाई मर्यादित, व्यवस्थित र सुरक्षित बनाउन सिरहामा सयौं प्रहरी परिचालन गरिएको एसपी पाण्डेले बताए ।
सुरक्षा व्यवस्थालाई प्रभावकारी बनाउन ठाउँठाउँमा सादा पोशाक र हतियारसहितका प्रहरीको विशेष टोली परिचालन गरिएको उनको भनाइ । प्रहरीको पिकेट, मोबाइल, साइकल र पैदल गस्ती बढाएर सुरक्षा व्यवस्था मिलाउन थालेको छ । कोरोनाका कारण यस वर्ष खासै भीडभाड नहुने भए पनि धार्मिक तीर्थस्थल, शक्तिपीठ, मठ मन्दिर लगायत विगतमा भक्तजनहरुको भीडभाड एवं घुइँचो हुने स्थानमा हुनसक्ने सम्भावित अपराध नियन्त्रण गर्न प्रहरी सक्रिय बनेको छ ।
प्रहरी उपरीक्षक पाण्डेका अनुसार मापसेबाट हुने झैझगडा एवं अपराध नियन्त्रण, कालो बजारी, इन्धन तथा दैनिक उपभोग्य वस्तुको कृतिम अभाव, सीमा क्षेत्रबाट हुने चोरी तस्करी नियन्त्रण लगायतमा प्रहरीले बढी जोड दिएको छ । चाडपर्वमा यातायातको सहज उपलब्धता, ट्राफिक व्यवस्थापन, तस्करी, हातहतियार तथा लागुऔषध र मदिराको अवैध ओसारपसार नियन्त्रण प्रहरीको प्राथमिकतामा रहेको उनले उल्लेख गरे ।
त्यस्तै जुवा, तास लगायत गैह्र कानुनी खेलहरु र शान्ति भड्काउनेसमूहलाई पूर्ण रुपमा नियन्त्रणमा लिइने नीति प्रहरीले बनाएको छ । एसपी पाण्डेका अनुसार उद्योग, कलकारखाना, महत्वपूर्ण प्रतिष्ठान, राजमार्ग तथा अन्य सहायक राजमार्गको सुरक्षा अवस्थामा कुनै कमी आउन नदिने प्रहरीको योजना छ ।
पटकाको ओसारपसार तथा बेचबिखन, सीमा क्षेत्रमा कडाई, पकेटमार लगायत अपराधिक प्रवृत्तिका मानिसहरुको पहिचान र नियन्त्रण थालिएको छ । सवारी साधनमाथि आकस्मिक चेकजाँच सुरु गरिएको छ । प्रहरीले मापसे गरेर सवारी साधन चलाउन पूर्ण रुपमा रोक लगाउँदै दुर्घटनामा कमी ल्याउन विभिन्न जनचेतनामुलक कार्यक्रम गरिरहेको छ ।
एसपी पाण्डेका अनुसार कोरोना संक्रमण बढिरहेकाले चाडपर्वमा झन् जोखिम हुन सक्नेभन्दै मास्क, सेनिटाइजर प्रयोग गर्न र भीडभाड नगर्न एवं संक्रमण नफैलने गरी सुरक्षित हिसाबमा चाडपर्व मनाउन सबैमा आग्रह गर्दै माइकिङ गर्दै सन्देशमुलक कार्यक्रमहरु भइरहेका छन् ।
नेपाल–भारत सीमा क्षेत्रमा लुकिछिपी हुने चोरी तस्करी नियन्त्रण गर्न प्रहरीले ‘स्वीप अप्रेशन’ सञ्चालन गरेको छ । सीमा क्षेत्रमा भइरहेका मानवीय चहलपहल नियन्त्रण एवं रोकथाम गरेर तस्करीलाई शून्यमा झार्ने योजनाका साथ अप्रेशन चलाइएको एसपी पाण्डेको भनाइ छ ।
चाडपर्वलाई लक्षित गरेर प्रहरीले प्रशासन लगायतका निकायसँग समन्वय गर्दै अत्यावश्यक सेवाका साधनहरु एम्बुलेन्स र दमकल तयारी अवस्थामा राखेको छ । कुनै पनि घटनामा परेर घाइते भएकाको उपचारका लागि कोशी लगायत सबै अस्पताललाई २४ घण्टानै तयारी अवस्थामा राख्न प्रमुख जिल्ला अधिकारी ( सिडियो ) प्रदिप राज कणेलसँग समन्वय भइसकेको एसपी पाण्डेको भनाइ छ । उनका अनुसार कोरोना भाइरसको संक्रमण नियन्त्रण एवं रोकथामका लागि तोकिएको स्वास्थ्य सुरक्षा मापदण्डलाई कडाईकासाथ पालना गराउन पनि प्रहरी सक्रिय भएर लागेको छ ।
यसैबीच प्रदेश २ प्रहरी प्रमुख प्रहरी नायव ( डीआईजी ) उमेश रञ्जितकारले पनि चाडपर्वका समयमा प्रदेशको सुरक्षा व्यवस्थामा कुनै कमी आउन नदिने बताएका छन् । उनले चाडपर्वलाई लक्षित गर्दै प्रदेशका ८ वटै जिल्लाको सुरक्षा अवस्था मजवुत बनाएर लगिएको जानकारी दिए ।
ठूलो संख्यामा प्रहरी परिचालन गर्दै शंकास्पद ठाउँहरुमा निगरानी बढाउने, गलत गर्न खोज्नेलाई नियन्त्रणमा लिने तथा सार्वजनिक स्थलदेखि लिएर सबै ठाउँमा २४ घण्टानै सुरक्षा प्रदान गर्ने काम थालिएको कार्कीको भनाइ छ । उनले अपराध गरेर फाइदा उठाउने मनसाय राख्नेहरु तत्काल प्रहरीको फन्दामा पर्ने जानकारी दिए ।
डीआईजी उमेश रञ्जितकारले कोरोना संक्रमण फैलिइरहेका बेला सबैले सुरक्षित ढंगले र संक्रमण हुन नदिने हिसाबले स्वास्थ्य सम्बन्धी मापदण्डको पालना गर्दै चाडपर्व मनाउनुु पर्नेमा जोड दिए । उनले गलत कार्य गर्न खोज्ने शंकास्पद व्यक्तिहरुका बारेमा तत्काल प्रहरीलाई जानकारी दिन प्रदेशका बासिन्दालाई आग्रह गरेका छन् ।
हिन्दु धर्मावलम्बीको तिहारले छपक्कै छोपेको छ । चाडपर्व सौहार्दपूर्ण वातावरणमा सुरक्षित ढंगले मनाउने चाहना सबैको हुने प्रहरी नायव महानिरीक्षक उमेश रञ्जितकारले बताए ।
चाडपर्वलाई मर्यादित र सुुरक्षित बनाउनु सबैको दायित्व पनि हो ।चाडपर्वको मौका छोपेर अपराधिक घटना गराउने र अवैध गतिविधी गर्नेहरु सक्रिय हुनसक्नेतर्फ प्रहरी सचेत रहेको उनको भनाइ छ । रञ्जितकारका अनुसार यस्तो बेलामा शंकास्पद गतिविधी गर्नेहरु भेटिएमा तत्काल प्रहरीलाई खबर गर्नुपर्छ । प्रहरीले शंकास्पद गतिविधीका बारेमा समयमै सूचना पाउन नसक्दा जघन्य प्रकृतिका अपराधिक घटना हुनसक्छन् ।
