काठमाडौं । छिमेकी राष्ट्र भारतको उत्तर–पूर्वी राज्य त्रिपुरामा मुस्लिमहरूको सम्पत्ति र मस्जिदहरूमा हमला भएपछि तनाव सिर्जना भएको छ । हिंसा भड्किएपछि हिन्दू समूह र प्रहरीबीच केही झडपहरू भएका थिए ।

हमला प्रभावित क्षेत्रहरूमा सुरक्षा व्यवस्था कडा पारिएको छ, भने जमघटमा प्रतिबन्ध लगाइएको छ । त्यहाँका प्रशासनले केही इलाकाहरुमा भारतीय दंड संहिताको धारा १४४ लागू गरेको छ । जसको कारण पनि एक ठाउँमा चार जना भन्दा बढी ब्यक्ति जम्मा हुन पाउने छैनन् ।

सो समूहले हालै बाङ्लादेशमा हिन्दूहरूमाथि गरिएका हमलाको विरोधमा ¥याली आयोजना गर्न नदिएको भन्दै प्रहरीविरूद्ध नै प्रदर्शन गरेका थिए । यसै महिनाको सुरुतिर भारतको छिमेकी राष्ट्र बाङ्लादेशमा भएका घटनामा कम्तीमा ७ जनाको मृत्यु भएको थियो ।

दूर्गा पूजाको अवसरमा कुरानको अपमान गरिएको भन्ने हल्ला फैलिएपछि त्यहाँका मन्दिरहरूमा आक्रमण भएको थियो, भने अल्पसंख्याक हिन्दूहरूका सयौँ घर र व्यवसायहरू जलाइएका थिए ।

भारतको त्रिपुरा ३ तिरबाट बाङ्लादेशले घेरिएको छ । धेरैजसो हिंसा बाङ्लादेशसँगको सीमावर्त क्षेत्रमा भएको भएको बताइएको छ । उक्त राज्य सन् २०१८ पछि केन्द्रमा सत्ता सञ्चालन गरिरहेको भारतीय जनता पार्टी (भाजपा)को नेतृत्वमा छ ।

त्यसअघि त्यहाँ २५ वर्ष कम्युनिष्ट शासन चलेको थियो । जानकारी अनुसार पछिल्ला चार दिनमा मात्र उत्तर त्रिपुरा जिल्लामा धार्मिक हिंसाका १० वटा घटना भएका छन् ।

गत मङ्गलवार रातिको हिंसापछि सीमावर्ती शहर पानीसागरमा ठूला समारोहहरू गर्नमा रोक लगाइएको छ । मङ्गलवार राति मुस्लिमहरूका कैयौँ पसल र एउटा मस्जिदमा तोडफोड गरिएको थियो ।

उक्त हमलापछि हिन्दूवादी सङ्गठन विश्व हिन्दू परिषद्को आयोजनामा एउर्टा याली भएको थियो । उक्त ¥यालीमा झण्डै ३५०० मानिसहरू सहभागी भएका बताइएको छ । त्रिपुरामा झण्डै ४२ लाख जनसङ्ख्यामध्ये मुस्लिमहरू ९ प्रतिशतभन्दा कम छन् ।

नगर निकाय चुनाव

हमला प्रभावित क्षेत्रहरूमा प्रशासनले चार जना भन्दा बढी ब्यक्तिलाई एक ठाउँमा जम्मा हुन रोक लगाएको छ । त्रिपुरा स्टुडेन्टस् अर्गनाइजेशन अफ इन्डिया (एसआईओ)का अध्यक्ष शफीकुल रहमानका अनुसार त्रिपुरामा जारी हिंसा र तनावका मुख्य कारण बंगलादेशमा भएको हिंसा मात्र नभई आगामी महिना हुने नगर निकाय चुनाव पनि रहेको छ ।

उनले भनेका छन्, ‘कोरोना महामारीको चरम विन्दूमा नगरपालिका चुनाव हुनेवालामा थियो । तर, कोरोना संक्रमण झन फैलिदै गएपछि सरकारले स्थगित गरेको थियो । अहिले आएर हिंसा सुरु हुनसाथ सरकारले चुनावको मिति घोषणा गरेको छ ।’