काठमाडौं । नेपाली सेनाका सहायकरथी बाबुराम श्रेष्ठ उपरथीमा बढुवा भएका छन् । उनलाई सोमबार बसेको मन्त्रिपरिषद् बैठकले बढुवा गरेको हो । उनलाई जंगी अड्डाले असोजको दोस्रो साता बढुवाका लागि रक्षा मन्त्रालयमा सिफारिस गरेको थियो ।
सैनिक मुख्यालयले श्रेष्ठलाई उपरथीमा बढुवाका लागि सिफारिस गरेको हो । मन्त्रिपरिषदले श्रेष्ठलाई मध्य कमाण्ड प्रमुखको जिम्मेबारीमा पदस्थापन गरेको छ । त्यहाँ रहेका उपरथी विनयविक्रम राणालाई जंगी अड्डामा सरुवा भएको छ ।
श्रेष्ठ सेनाका २६ बेसिकका अधिकृत हुन् । उनी सेनाको तालिम महानिर्देशनालयमा कार्यरत थिए । उनले पाकिस्तानबाट नेशनल डिफेन्स कोर्स (एनडीसी) गरेका छन् । श्रेष्ठको ब्याचका सहदेव खड्का, विनय राणा र सन्तोष ढकाल यसअघि नै उपरथी भइसके पनि उनी भने यसअघिका प्रधानसेनापति पूूर्णचन्द्र थापाको ‘कोपभाजन’मा पर्दा बढुवा हुन सकेका थिएनन् ।
२७ नम्बर वाहिनीको वाहिनीपति हुंदा आफ्नो क्षेत्रका बासिन्दालाई ल्याएर भर्ना फारम भर्न लगाएको भन्दै श्रेष्ठलाई नसिहत दिइएको थियो । यस घटनामा श्रेष्ठ संलग्न नभए पनि थापाले पूर्वाग्राह राखेर कारबाही गरेको सेनाभित्रै चर्चा हुँदै आएको छ ।
