इनरुवा । सुनसरीको बराहक्षेत्र ११ स्थित मधुवन प्रहरीले साथमा बोकेको हतियार पेस्तोल भारतिय तस्करले लुटेर लगेका छन ।सोमबार राती भारतबाट तस्करी गरेर चक्रघट्टी तर्फ लैजादै गरेको अवैध मालसामान रोक्ने क्रममा विवाद भएपछि तस्करले मधुवन प्रहरीको पेस्तोल लुटेर लगेको हो ।
विवाद बढदै गएपछि रातीको समयमा भारतीय तस्करले मधुवन प्रहरी चौकीमा कार्यरत रहेका प्रहरी सहायक निरिक्षक नरेन्द्र कार्कीले बोकी राखेको पेस्तोल लुटेर लौकही सिमानाकाबाट भारत तर्फ भागेका थिए ।
उच्च प्रहरी स्रोतका अनुसार असोज २५ गते राती मधुवन इलाकामा अवैधमा रुपमा भन्सार छली गरि चोरी तस्करीको मालसामान लैजादै गरेको तस्करको समुहलाई रोकी चेकजाँच गर्ने क्रममा प्रहरीसँग तस्करको विवाद भएको थियो।
प्रहरीको पेस्तोल लुटेर भागे लगतै तस्करको पिछा गर्दै गएको सुरक्षाकर्मीले सो पोस्तोल तत्काल फेला पार्न सकेका थिएनन् ।
लौकहीमा रहेको सशस्त्र प्रहरी वल बोर्डर आउट पोष्ट विओपीको सहयोगमा भारतिय सिमा सुरक्षा वल एसएसवीको टोलीले भारतको बिहार राज्यको अररिया जिल्लाको बेलाहा बसमतीया क्षेत्रमा लुकेर बसेका पेस्तोल लुटने तस्करलाई फेला पारी पेस्तोल फिर्ता ल्याएको उच्च प्रहरी स्रोतले जनाएको छ ।
पेस्तोल लुटेर भाग्ने तस्कर भारत बिहार राज्य अररिया जिल्ला बेलाहा ग्राम पञ्चायत स्थित बसमतियाका दिपु यादव भन्ने व्यत्ती रहेको स्रोतले जनाएको छ ।
भारतिय सिमा सुरक्षा वल एसएसवीको टोलीले असोज २६ गते साझमा पेस्ताेल लुटने तस्क लौकहीमा रहेको सशस्त्र प्रहरीको विओपीलाई बुझाएपछि नेपाल प्रहरीले दिपु यादवलाई जिल्ला प्रहरी कार्यालय इनरूवा लिएर आएको सुरक्षा स्रोतले जनाएको छ ।
जिल्ला प्रहरी कार्यालय सुनसरीले भने पेस्तोल लुटिएको घटनाका बारेमा अनभिज्ञता प्रकट गर्दै घटना बारे थाहा नभएको प्रतिकृया दिएको छ ।
पेस्तोल लुटिएपछि मधुवन चौकीमा कार्यरत रहेका प्रहरी सहायक निरिक्षक नरेन्द्र कार्कीसहितको टोलीलाई मंगलवार जिल्ला प्रहरी कार्यालय इनरुवा झिकाएर अनुसन्धान थालिएको प्रहरी स्रोतले जनाएको छ ।
मधुवनका स्थानियका अनुसार प्रहरी सहायक निरिक्षक कार्की मधुवनमा भलादमी प्रहरीका रुपमा परिचित रहेकाले तस्करले उनको नरम व्यवहारका कारण पेस्तोल लुटन सफल भएको बताउछन।
