काठमाडौं । औषधी पसल चलाउन फार्मेसी काउन्सिलबाट जारी गरिने नक्कली प्रमाणपत्र बनाएको आरोपमा प्रहरीले ललितपुरबाट एक जनालाई पक्राउ गरेको छ । बागलुङको बडीगार्ड गाउँपालिका–९ घर भएका ३२ वर्षीय युद्ध बहादुर केसीलाई पक्राउ गरिएको ललितपुरकी एसएसपी किरण बज्राचार्यले बताइन् ।
नेपाल र भारतका मेडिकल कलेजबाट पास गरेको डिप्लोमा इन फार्मेसीको सर्टिफिकेट बनाएर केसीले फार्मेसी काउन्सिलबाट जारी गरिने नक्कली प्रमाणपत्र बनाउने गरेको प्रहरीको प्रारम्भिक अनुसन्धानबाट थाहा भएको छ । डिप्लोमा इन फार्मेसी पास भएपछि फार्मेसी काउन्सिलबाट दर्ता प्रमाणपत्र लिनुपर्छ ।
डिप्लोमा इन फार्मेसी र फार्मेसी काउन्सिलको प्रमाणपत्र बनाएर उनले ३ लाखसम्म लिने गरेको थाहा भएको छ । प्रवेशपत्रमा फरक मान्छेको फोटो टाँसेर परीक्षा दिन लगाउने र सो हर्कत सफल नभएमा उनले फार्मेसी काउन्सिलका चिकित्सकको नक्कली हस्ताक्षर गरेर प्रमाणपत्र बनाउने गरेका थिए ।
केसी विरुद्ध ललितपुर प्रहरीले लिखत सम्बन्धी कसुरमा म्याद लिएर अनुसन्धान सुरु गरेको छ । उनले झापाको बिर्तामोडका एकजना डाक्टरसँग मेडिकल काउन्सिलले जारी गर्ने प्रमाणपत्र बनाइदिन्छु भनेर २ लाख रुपैयाँ ठगी गरेको थाहा भएको छ ।
