काठमाडौं । नेकपा (एकीकृत समाजवादी) का अध्यक्ष तथा पूर्वप्रधानमन्त्री माधवकुमार नेपालले ओलीविरुद्धको लडाइमा अघि सार्नेहरुलाई पछि फर्केर हेर्दा खुट्टा कमाएर भागेको बताएका छन् ।
शनिबार पेशागत महासंघ नेपाल, बागमती प्रदेशद्वारा आयोजित ललितपुर जिल्लास्तरीय भेला तथा प्रशिक्षण कार्यक्रमलाई सम्बोधन गर्दै आफूलाई उक्साउनेहरुले धोका दिएको उनले बताए ।
उनले भने, ‘ओलीविरुद्धको लडाइँमा मलाई घचेटेर अगाडि बढ भने तर मैले पछाडि हेर्दा त कोही पनि छैन। सबै खुट्टा कमाएर हिँडिसकेछन् ।’ ओलीविरुद्धको लडाइमा तीनै नेताहरुले भनेबमोजिम कदम चालेको र, ओलीलाई प्रधानमन्त्रीबाट हटाउन सफल पनि भएको उनले बताए ।
उनले भने, ‘ओलीविरुद्धको लडाइँमा अगाडि बढ्नोस् जोसुकैलाई प्रधानमन्त्री बनाए हुन्छ तर केपी ओलीलाई फाल्नै पर्छ भनेका थिए । उनीहरुले भनेपछि ओलीलाई संसदबाटै फाल्न म लागेकै हो। सडकबाट फाल्न नसकिने भएकाले संसदको गतिविधिमा भाग नलिएर बहिष्कार गर्यौँ। त्यहीकारण ओलीले सत्ता पनि छाड्नुपर्यो।’
हाल नेपाललाई साथ दिएर अन्त्य अवस्थामा छाडेर हिँड्नेहरुमा नेकपा एमालेका उपाध्यक्ष भीम रावलसहित घनश्याम भुसाल, गोकर्ण विष्ट, योगेश भट्टराई, सुरेन्द्र पाण्डेलगायत रहेका छन् । नेपाललाई उक्साएर अन्तमा उनीहरु १० बुँदे मागसहित एमाले एकतामै रहने भनिसकेका छन् ।तर, अध्यक्ष नेपालले भने एमाले विभाजनलाई एउटा सामान्य घटना भनेर भनेका छन् । साथै, राजनीतिक जीवनमा कहिलकाहीँ उतारचढाव हुने उनको भनाइ छ ।
उनले भनेका छन्, ‘एउटा व्यक्तिको राजनीतिक जीवनमा यस्ता घटना परिघटना भइरहन्छन्। केही केही व्यक्तिहरु पार्टी विभाजित हुँदा रमाउँछन्, नाच्छन्,भोज खान्छन् ।’
गलत विचार र प्रवृत्तिविरुद्ध जुध्ने सबै ढोका बन्द भएपछि विद्रोह गर्नुपरेको पनि नेपालले बताएका छन्। उनले भनेका छन्,‘केपी ओलीमा सुधारका कुनै लक्षण नभएपछि, प्रतिगमनबाट पछि हट्ने संकेत नदेखिएपछि विद्रोह गरेका हौँ ।’
उनले आफू ओलीजसरी पदमा नबस्ने पनि बताएका छन् । ‘पुष्पलालले केशरजंगसँग विद्रोह गरेर नयाँ पार्टी बनाए। हामीले पनि पुष्पलाललाई पनि छाड्यौँ,’ उनले भनेका छन्, ‘एक कार्यकालभन्दा बढी म पार्टीअको अध्यक्ष पदमा बस्ने छैन। अरु जस्तो नक्कली छैन। एउटा कार्यकाल मात्रै बस्छु, ओली जस्तो होइन।’
