जन प्रभाब-सम्बादाता / २०७७ बैशाख २१ गते .
 

सिरहा । लकडाउनलाई प्रभावकारी बनाउन प्रहरीको भुमिका महत्वपूर्ण देखिएको छ । छिटफुट घट्नामा प्रहरी विवादित बनेपनि सरकारले घोषणा गरेको लकडाउनलाई सफल बनाउन नेपाल प्रहरीले महत्वपूर्ण भुमिका खेलेको चर्चा आइरहेका छन् ।

प्रदेश नम्बर २ का ८ वटै जिल्लामा अहिलेसम्म लकडाउन अवधीभर प्रहरीले अमानविय व्यवहार देखाएको छैन । यसको सफलतामा जिल्ला प्रहरी प्रमुखको कमाण्डीङ नै प्रमुख रहेको हुन सक्ने आकलन गरिएको छ । प्रदेश २ बासीलाई तपाईको शान्ति सुरक्षा र कोरोना भाईरसबाट बच्न सरकारले गरेको लकडाउनमा प्रहरीलाई सघाउन २ नम्बर प्रदेश प्रहरी कार्यालय जनकपुरधामका प्रमुख डिआइजी धिरज प्रताप सिंहले आग्रह गरेका छन् ।

राजमार्गदेखि सिमा क्षेत्र सम्मको लकडाउनमा सुरक्षा दिने प्रहरीको कमाण्डीङ् सम्हालेका सिंहले संचारकर्मीहरुको कुराकानीमा प्रदेश २ का ८ वटै जिल्ला वासीलाई कोरोना भाइरसबाट बच्न गरिएको लकडाउनलाई सफल बनाउन प्रहरीलाई सघाउन सुझाव दिएका छन् ।
विश्वनै कोरोनाको माहामारीमा रहेका बेला प्रहरीले पनि आफु सुरक्षित रहेर जनताको सेवा गर्नुपर्ने अवस्था छ डिआइजी सिंहले भने, “यो विषम परिस्थितीमा प्रहरी तपाईको सुरक्षाका लागि खटिएको छ ।” कोरोना भाईरस बाट बच्ने सबै भन्दा उत्तम उपाय भनेको लकडाउन नै भएकाले चौविसै घण्टा खटिएको प्रहरीलाई सघाउन सबै नागरिकलाई आग्रह गर्न चाहान्छु उनले भने ।

प्रदेश २ सरकार र स्थानीय सरकारहरु सगँ समन्वय गरेर सेवा प्रवाह गर्न पनि प्रहरी प्रमुख प्रहरी नायव महानिरीक्षक(डिआइजी) धिरज प्रताप सिंहले आफ्ना मातहतका ८ वटै जिल्ला प्रहरी प्रमुखहरुलाई निर्देशन समेत दिएका छन् । यो संक्रमणमा जिल्ला प्रशासन, जनप्रतिनिधि, सामाजिक संघसंसथा लगायत सगँ समन्वय गरेर काम गर्न निर्देशन दिनु भयो । यो समन्वय नै लकडाउन सफलताको प्रमुख आधार हो ।” राजनीति भन्दा माथी उठेर यो संक्रमणलाई सामाना गर्नु सबै प्रदेश २ वासीको दायीत्व हो उनले भने ।

डिउटीमा खटिएका प्रहरीहरुलाई कसरी सुरक्षित रहेर सेवा प्रवाह गर्ने निर्देशन दिनुभएको छ भन्ने संचारकर्मीहरुको जिज्ञासामा २ नम्बर प्रदेशका प्रहरी प्रमुख समेत रहेका सिंहले केही स्वास्थ्य सुरक्षाका सामाग्रीहरु हामीले पनि दिएका छौ र केही जिल्ला प्रशासन, रेडक्रस लगायका संघ संस्थाले सहयोग गरेका छन् ।

मास्क, सेनिटाईजर र अत्यन्तै संवेदनशिलमा पिपिईको व्यवस्था सहित उनीहरुलाई आफु सुरक्षित रहेर डिउटी गर्ने निर्देशानुसार खटाइएको उनले बताए । यो संक्रमणकालिन अवस्थामा जिल्ला प्रहरी प्रमुखहरुले खेलेको भुमिका प्रति सबै जनप्रतिनिधि र राजनीतिक दलका नेताहरुले प्रशंसनिय कार्य रहेको बताएका छन् ।