विराटनगर । विराटनगर भन्सार कार्यालयबाट लाखौंं रूपैयाँ राजस्व छलेर गरी सामान आयात हुने गरेको पाइएको छ । भन्सारका कर्मचारी, भन्सार एजेन्ट र प्रतिनिधिहरूको मिलेमतोमा राजस्व छली हुने गरेको हो ।
राजस्व अनुसन्धान कार्यालय इटहरीले आइतबार राति १० बजे कपडा र हार्डवेयरका सामग्री बाकेको दुई वटा ट्याक्टर भन्सार छलेर आएको आशंकामा नियन्त्रणमा लिएपछि भन्सार छलेको तथ्य बाहिर आएको हो । को २ त ६८११ नम्बरको कपडा बोकेको ट्रयाक्टर प्रज्ञापनपत्रविना वेवारिसे अवस्थामा विराटनगर १३ सैनिक टोलबाट प्रहरीले नियन्त्रणमा लिइको थियो भने बीआर ५० जी ५०५३ नम्बरको ट्याक्टर राजस्व कार्यालयले नियन्त्रणमा लिएको हो ।
नियन्त्रणमा लिएको हार्डवेयर र कपडा बोकेको भारतीय नम्बरको ट्याक्टरको प्रज्ञापनपत्र भएपनि भिसिटिएस नगरी पठाएको पाइएको राजस्व कार्यालय इटहरीका प्रमुख दिपक खड्काले जानकारी दिए । सरकारले मालवस्तुको ढुवानीमा राजश्व चुवाहट रोक्न भिसिटिएस (भेहिकल, कन्साइमेन्ट ट्रयाकिङ्ग सिस्टम) कार्यान्वयनमा ल्याएपनि भन्सारसँगको ‘सेटिङ’मा सवारी तथा मालवस्तुको बिनाप्रविष्ट नै भन्सार जाँचपास हुने गरेको पाइएको छ ।
‘ढुवानी व्यवसायलाई प्रणालीबाटै अनुगमन गरेर पारदर्शिता कायम गर्न भिसिटिएस लागू भएको हो,’ राजस्व अनुसन्धानका प्रमुख खड्काले भने, ‘तर, भन्सार हुँदै निस्किएर हामीले बरामद गरेको सामानको भिसिटिएस पनि गरेको भेटिएन ।’ भन्सार बिन्दुमा न्यून मूल्यांकनमा जाँचपास गरिएको कपडा, मिल मेशिनगरी, पाइपसमेत रहेका दुईवटा गाडीकै विवरण भिसिटीएसमा नभेटिएपछि विराटनगर भन्सार कार्यालयको कार्यशैलीप्रति प्रश्न उब्जिएको हो ।
‘राजस्व छली गरिएको आशंकामा अहिले भौतिक रूपमा मालवस्तुको गणना भइरहेको छ,’ खडकाले भने । उनका अनुसार भारतीय नम्बर प्लेटको बीआर ५० जी ५०५३ र को १ त ६८११ नम्बरको ट्याक्टर भन्सार बिन्दुमा जाँचपासपछि छुटेको थियो । त्यसक्रममा भन्सार कार्यालयबाट मुख्य राजमार्गसम्म आउने आईसीपी सडक खण्डमा गाडी नियन्त्रणमा लिइएको हो ।
सामानमा प्रतिइकाई मूल्य अंतिक स्टिकर स्पष्ट भएपनि भन्सार कार्यालयले १ सय रुपैयाँको मूल्यांकनमा मात्रै कपडा छोडेको पाइएको छ । दुईवटा ट्याक्टरमध्ये एउटाको मात्रै प्रज्ञापनपत्रमा सामान छुटेको थियो । कपडा भनेर न्यून भन्सार जाँचपासमा गरिएको ट्याक्टरभित्र कपडाले छोपेर मेशिनरी आईटम, पाइप आईटम ल्याएको पाइएको राजश्व अनुसन्धान कार्यालयले जनाएको छ । भारतीय कम्पनिका कपडामा ३७९, ४५० र ५९९ रुपैया मूल्य अंकित स्टिकर टाँसिएको कपडा पनि एक सय रुपैयाँ मात्रै मूल्यांकन गरेर छाडिएको पाइएको छ ।
राजस्वले नियन्त्रणमा लिएको दुई ट्रयाक्टरको कपडा र हार्डवेयरको सामग्री एजेन्ट प्रतिनिधि विराटनगरका अक्बर अलीले आयात गरेको खुलेको छ । अलि भन्सार एजेन्ट भरतराज भट्टराईका प्रतिनिधि हुन् । सेटिङ्ग मिलाउन माहिर अलिले भन्सार एजेन्ट भट्टराईलाई प्रयोग गरेको बुझिएको छ ।
अलिले विगत लामो समयदेखि सबै क्षेत्रका अधिकारीहरुलाई नजराना थमाएर दैनिक निकै ठूलो परिमाणमा भन्सारमा न्यून बिजकीकरण गरिएका र भन्सार छलिएका सामान नक्कली प्रज्ञापनपत्रको भरमा पूर्वको विभिन्न सहर हुँदै काठमाडौसम्म पु¥याउने गरेका छन् ।
अलीले ‘अली टे«डस’को नाममा राजस्व छलेका सामग्रीहरू काठमाडौका व्यापारी नसिम खानलाई पठाउने गरेका छन् । उनले आइतबार भित्र्याएको २ ट्याक्टर सामग्री ४० लाख रुपैयाँको रहेको बुझिएको छ । तर, ती सामानको भन्सार बिन्दुमा १ लाख २२ हजार रुपैयाँ मात्रै महसुल बुझाइएको छ । जबकि ४० लाख मूल्यको सामग्रीको २० प्रतिशत भन्सार महसुल र १३ प्रतिशत भ्याट गरेर अलीले १३ लाख २० हजार रुपैयाँ बुझाउनुपर्ने थियो ।
भन्सारका प्रमुखदेखि अधिकृत र तल्लो तहका कर्मचारीसम्मलाई सेटिङ्ग मिलाउन माहिर अलीले १२ लाख रूपैयाँ राजस्व छली गरेको आशंका गरिएको छ । राजश्वले नियोजित रुपमा भन्सार प्रशासनको समेत संलग्नतामा सामान भित्र्याएको आशंका गरेको छ ।
लाखौं रूपैयाँ राजस्व चुहावट भएको खुलेपछि विराटनगर भन्सार प्रमुख शिवप्रसाद भण्डारी पनि विवादमा मुछिएका छन् । उनले त्यस प्रकरणको छानविन गरिने बताएका छन् । यसअघि पनि एउटै बिलविजकमा दोहोरो मालवस्तु भित्र्याउने र सामानको न्यून मूल्यांकन गर्ने गरिएको फेला परेको थियो ।
यसअघि अलीले भन्सार छलेर भण्डारण गरेको १० लाख रुपैयाँ बराबरको कपडा नेपाल प्रहरीले गोदामबाटै बरामद गरेको थियो । विराटनगर भन्सार कार्यालयका सूचना अधिकृत सन्तोष यादवले ठूला कार्यालयमा कहीँकतै मिलेमतो हुने गरेको र त्यस्ता गलत क्रियाकलापलाई सच्याउँदै जाने बताएका छन् । न्यून भन्सार राजश्व असुलीसँग कम मूल्यांकनको एउटा घटनालाई जोड्न नमिल्ने उनले बताए ।
