काठमाडौं ।काठमाडौं प्रहरी परिसरको विशेष टोलीले ७ वटा सहकारी फुटाएर नगद तथा गहना चोरेको आरोपमा एकजना युवकलाई पक्राउ गरेको छ । पक्राउ पर्नेमा नुवाकोट घर भई काठमाडौंको जोरपाटी बस्दै आएका २२ वर्षीय दिपक गजुरेल छन् । असार १२ मा उनलाई गौशालाबाट पक्राउ गरिएको महानगरीय प्रहरी परिसर काठमाडौंले जनाएको छ ।
बानेश्वर, कोटेश्वर, गौशाला र मैतीदेवी क्षेत्रका सहकारीबाट दीपकले ४३ लाख ९७ हजार नगद र ९ तोला सुन चोरेको प्रहरीको प्रारम्भिक अनुसन्धानबाट थाहा भएको छ । गजुरेलले सिसा काट्ने मेशिनले झ्यालको सिसा काटेर उनले चोरी गर्ने गरेको स्वीकार गरिसकेका छन्।उनी यसअघि पनि सहकारी चोरी गरेको अभियोगमा जेलसमेत परेर छुटेका व्यक्ति हुन् ।
दीपकले बानेश्वरको बेबिलोन उपभोक्ता सहकारीबाट ०७७ माघ १५ मा ७ लाख २ हजार चोरेका थिए । त्यसयता उनले शंखमुलस्थित घर संसार सहकारीबाट २ लाख २४ हजार र मित्रपार्कस्थित पन्च बचत तथा ऋण सहकारीबाट १४ लाख ९८ हजार चोरी गरेको अनुसन्धानबाट थाहा भएको छ ।
कोटेश्वरस्थित सिमश स्वामी बचत तथा ऋण सहकारीबाट २ लाख, बानेश्वरको सन्दुक बचत तथा ऋण सहकारीबाट १० लाख १३ हजार र मैतीदेवीको जेष्ठ आइडोलोजी बचत तथा ऋण सहकारीबाट ५ लाख नगद चोरेको महानगरीय प्रहरी परिसर काठमाडौंले जनाएको छ ।आरोपीले मैतीदेवीको गौंथली बचत तथा ऋण सहकारीबाट २ लाख ५८ हजार र ९ तोला गहना चोरेको प्रहरीको अनुसन्धानबाट खुलेको छ ।
