काठमाडौं । जनता समाजवादी पार्टी (जसपा)को उपेन्द्र यादव पक्षले पार्टीको वैधानिकता दाबी गर्दै निर्वाचन आयोगमा निवेदन दिएको छ । शुक्रबार यादव पक्षका जसपा नेताहरु आयोगमा पुगेर आफुसँग बहुमत कार्यकारिणी सदस्य रहेको भन्दै ३० जना सदस्यको हस्ताक्षरसहित आधिकारिकताका लागि निवेदन दिएको हो ।

राजनीतिक दलसम्बन्धी ऐनको दफा ४३ सम्बन्धी विवाद भएको भन्दै ४४ अनुसार निरुपणका लागि निवेदन दिइएको जसपा नेता राजेन्द्र श्रेष्ठले जानकारी दिए ।पार्टीलाई कानून बमोजिम बहुमतका आधारमा सञ्चालनका लागि आधिकारिकता विवाद टुंग्याउनु परेको निवेदनमा उल्लेख गरिएको उनले बताए ।

आफुहरुको बैठकमा ६० प्रतिशत बढी सदस्यहरु रहेको र आफुहरुले गरेको निर्णय नै आधिकारी भएको जानकारी पनि आयोगमा गराइएको उनले जानकारी दिए । श्रेष्ठले विवाद निरुपणसम्बनधी निर्वाचन आयोगको पत्रलाई सम्मान गर्दै ३० जनाको हस्ताक्षरसहित निवेदन दर्ता गराएको बताए ।

बिहीबार बसेको कार्यकारिणी समितिको बैठकले वैधानिकता दाबी गर्ने निर्णय गरेको थियो । यसअघि दुवै पक्षले एक अर्कालाई कारबाही गर्दै विवरण अद्यावधिकका लागि आयोगमा निवेदन दिएपछि आयोगले दुवै पक्षका दाबी खारेज गरेको थियो ।