कृष्णा यादव / वीरगंज । वीरगंज महानगरपालिका वडा नं १४ बहुअरीस्थित रहेको स्पर्श मल्टिस्प्यासिलिटी हस्पिटलले स्तरीय उपचार नै नगरी नियम विपरीत बिरामीसंग लाखौँ असुलेको छ । स्तरीय सुविधा दिने नाम राखी खोलिएको यस हस्पिटलले नेपाल सरकारले तोकेको नियमको धज्जी उडाउँदै उपचारको नाममा दोब्बर रकम असुलेको पाइएको हो ।
कोरोना महामारीलाई लक्षित गरी खोलेको यस स्पर्श हस्पिटलले जेठ ११ गते भर्ना भएका पर्साका बहुदरमाई नगरपालिका वडा नं १ निवासी ६८ बर्षिय छोटेलाल पण्डितसंग १७ दिनको अवधिमा लगभग ४ लाख रुपैयाँ असुलेको छ । उपचार गराउन आएका परिवारजनले हारगुहार लगाएपनि नियम विपरीत स्पर्श हस्पिटलले रकम असुलेरै छाडेको छ । कोरोना संक्रमित भई श्वास फेर्न गाह्रो भएको बेला उपचारका लागि स्पर्श हस्पिटल आएका पण्डितको १७ औँ दिनसम्म उपचार गराउँदा स्वास्थ्य अवस्था सुधार नभएपछि थप उपचारको लागि रेफर गराउँदा नेपाल सरकारले तोकेको रकमभन्दा बढी लाखौँ रुपैयाँ ठगी गरेको पाइएको छ ।
जिल्ला जनस्वास्थ्य कार्यालयका अनुसार आईसियुको बढीमा १५ हजार रुपैयाँ तोकेको छ । सरकारको नियम अनुसार १ लाख ३५ हजार मात्रै लिनु पर्ने थियो तर स्पर्श हस्पिटलले एक दिनको २२ हजारको दरले ९ दिनको आइसियु शुल्क १ लाख ९८ हजार अर्थात् ६३ हजार रुपैयाँ सोझै बढी रकम तिराएको छ । यसैगरी स्पर्श हस्पिटलले एचडियुको शुल्कमा समेत डेढ गुणा बढी रकम असुलेको छ ।
२५ वेडको मान्यता पाएको यस हस्पिटलको सम्पूर्ण रेखदेखको जिम्मा पाएको वीरगंज महानगरपालिका अन्तर्गतको स्वास्थ्य महाशाखाका प्रमुख अरुण महतोका अनुसार नेपाल सरकारले एचडियुका लागि एउटा बिरामीसंग एक दिनको बढीमा ७ हजार ५ सय मात्रै लिन पाउने मापदण्डमा रहेको छ । तर स्पर्श हस्पिटलले १२ हजारको दरले २ दिनको २४ हजार अर्थात् ९ हजार बढी रकम लिएको छ । स्वास्थ्य महाशाखाका प्रमुख महतोका अनुसार नेपाल सरकारको मापदण्ड अनुसार निजी अस्पतालको लागि एक दिनको उपचार बापत सम्पूर्ण खर्च २२ हजार ५ सय रुपैयाँ मात्र लिन पाउँछन् तर स्पर्श हस्पिटलले आइसियु र अक्सिजनको मात्रै ९ दिनसम्म प्रत्येक दिन २४ हजार ५ सय रुपैयाँ बिरामीलाई उपलब्ध गराएको बिलमै स्पष्ट रूपमा उल्लेख गरिएको छ । यस्तै हस्पिटलले डिलक्स शुल्क प्रतिदिन १८ हजारको दरले ६ दिनको १ लाख ८ हजार असुली गरेको छ । महामारीको बेला जनताको सेवाको लागि खोलिएको स्पर्श हस्पिटल पटक पटक विवादमा तानिँदै आएको छ ।
यस हस्पिटलले बैशाख ३० गते मुक्ति राउत कुर्मीसंग लिएको बिलमा आइसियु, चार्ज १५ हजार लिएको छ भने जेठ १० गते लालमुनी देवीसंग तिराएको बिलमा सोही आइसियुको चार्ज १५ हजार तिराएको छ भने अहिले आएर स्पर्श हस्पिटलले २२ हजार रुपैयाँ सोही आइसियुको लिएको छ ।
हस्पिटलले उपचार शुल्क मनपरी लिएर पनि बिरामी निको नगर्दा विपन्न तथा गरिब परिवारका व्यक्तिले यस हस्पिटलमा उपचार गराउँदा बिरामी निको भए पनि यस हस्पिटलको शुल्क तिर्न घर घडेरी समेत बेच्नु पर्ने बाध्यता हुन्छ । जबकी गरिब तथा विपन्न परिवारको उपचारको लागि वीरगंजका सन्दिप अग्रवाल, संजय अग्रवाल, अनुप अग्रवाल, राजिव अग्रवाल, आनन्द चौधरी, नुतन सरावगी र राजकुमार दारुका लगायतका समाजसेवीहरुले झण्डै ६ लाख ५० हजार रुपैयाको भेन्टिलेटर सहयोग गरेका थिए ।
