कञ्चनपुर। कञ्चनपुरमा लागुऔषधसहित ४ जना पक्राउ परेका छन् । जिल्लाको भीमदत्त नगरपालिका र बेलौरी नगरपालिकाका छुट्टा-छुट्टै स्थानबाट लागुऔषधसहित ४ जनालाई पक्राउ गरिएको प्रहरीले जनाएको छ ।

जिल्ला प्रहरी कार्यालयका प्रवक्ता प्रहरी नायब उपरीक्षक अमरबहादुर थापाले विशेष सूचनाका आधारमा खटिएको टोलीले भीमदत्त नगरपालिका-१ भाँसीबाट २ जना र बेलौरी नगरपालिका-७ कालोपुलबाट २ जानालाई पक्राउ गरिएको जानकारी दिए ।भीमदत्त नगरपालिकाको भाँसीबाट बेदकोट नगरपालिका-१ का २१ वर्षीय श्याम पाल र १९ वर्षीय सुरेन्द्र पाललाई पक्राउ गरिएको डीएसपी थापाले बताए ।

उनीहरुको साथबाट ५.०५ ग्राम खैरो हिरोइन बरामद गरिएको छ।यस्तै बेलौरी नगरपालिकाबाट कैलालीको धनगढी उपमहानगरपालिका-८ बस्ने २७ वर्षीय अम्लेसकुमार शाह र सोही ठाउँका २६ वर्षीय खड्कराज अवस्थीलाई पक्राउ गरिएको डीएसपी थापाले जानकारी दिए ।उनीहरुको साथबाट ०.७५० ग्राम खैरो हिरोइन बरामद गरिएको छ ।