काठमाडौं । जनता समाजवादी पार्टी (जसपा)मा बाबुराम भट्टराई–उपेन्द्र यादवपक्ष र महन्थ ठाकुर–राजेन्द्र महतोपक्ष आन्तरिक परामर्शमा व्यस्त भएका छन्। एकले अर्कोलाई स्पष्टीकरण सोध्नुका साथै नेताहरुबीच तिक्तता बढ्दै गएपछि फुटउन्मुख भएको पार्टी विभाजन रोक्न केही नेताहरु दैनिकजसो आन्तरिक परामर्शमा जुटेका हुन्।
जसपा पार्टी कार्यालय बबरमहलमा दैनिकजसो नेताहरु अनौपचारिक रुपमा बसेर छलफल गर्दै आएका छन्। पार्टीभित्र देखिएको द्वन्द्व र सरकारमा जाने विषयलाई लिएर दैनिक परामर्श हुने गरेको महन्थ–राजेन्द्रपक्षका एक सांसदले बताए। ‘तत्काल पार्टी विभाजन गरेर जाने भन्ने छैन। सकेसम्म पार्टी एकता गरेरै जानुपर्छ भन्ने मत बलियो छ,’ ती सांसदले भने, ‘अझै केही दिन एकता जोगाउन सकिन्छ कि भनेर सबैले प्रयत्न गर्नुपर्छ भन्ने छ।’
जसपालाई एकताबद्ध बनाउनुपर्ने भन्दै राजपा पक्षबाट मनिष सुमन, राजकिशोर यादवलगायत सक्रिय रुपमा लागेका छन्। मधेसी, जनजाति, थारु, मुस्लिमलगायत उत्पीडित समुदायको हकहितका लागि स्थापित पार्टीलाई वैकल्पिक शक्तिको रुपमा लैजानु पर्ने उनीहरुको जोड छ।
यस्तै बाबुराम–उपेन्द्र पक्षका नेताहरुले समेत पार्टी विभाजन राकेर एकतालाई जोड दिँदा राम्रो हुने धारणा राख्ने गरेका छन्। तत्कालीन राजपा सरकारमा नगएमा पार्टी एकता जोगाएर जान सक्ने बुझाइ छ। राजपाको तुलनामा तत्कालीन समाजवादी पक्षका नेताहरुले एकताकाे पक्षामा कम जोड दिएका छन्।
पार्टी विधानविपरीत राजपा पक्षका नेताहरुले अनुशासन उल्घंन गरेकाले एकतामा त्यति सारो जोड नदिएको बाबुराम–उपेन्द्रपक्षका एक नेताले बताए। तर, जसपा विभाजन गरेर अलग-अलग पार्टी चलाउनु पर्छ भन्नेमा दुबै पक्ष मानसिक रुपमा तयार भइसकेका छन्। जसपामा महन्थ–राजेन्द्रपक्षसँग बहुमत सांसद भएपनि ५२ सदस्यीय कार्यकारिणी समितिमा २२ जनामात्रै छन्। पार्टी विधानले सबैभन्दा शक्तिशाली मानिएको कार्यकारिणी समितिमा महन्थ–राजेन्द्रपक्ष अल्पमतमा भएकाले पार्टी विभाजन आफै गर्नुपर्ने छ।
जसपामा विवाद भएपनि तत्कालै पार्टी फुटाएर दर्ता गर्ने अवस्था नरहेको महन्थ–राजेन्द्रपक्षकी निवर्तमान सांसद चन्दा चौधरीले बताइन। पार्टीमा सकेसम्म एकता गरेर जानुपर्छ भन्ने दबाब भएकाले तत्काल विभाजन हुने सम्भावना कम रहेको चौधरीकाे भनाइ छ।
