सुनसरी । सुनसरीमा कोभिड–१९ को महामारीविरुद्ध नेपाली सेना परिचालन गरिएको छ । जिल्ला प्रशासन कार्यालय सुनसरीले निषेधाज्ञामा कडाइ गर्दै प्रमुख सहरहरूमा सेना परिचालन गरेको प्रमुख जिल्ला अधिकारी उमेशकुमार ढकालले बताए ।

उनले भने, ‘शनिबार बसेको जिल्ला सुरक्षा समन्वय समितिको निर्णयअनुसार कोभिड महामारीविरुद्ध सेना परिचालन गरिएको हो । सेनाले कोरोना महामारी फैलनबाट रोक्न गस्ती गर्दै जनचेतनामूलक कार्यक्रम गर्नेछ ।’

उनका अनुसार जनपद र सशस्त्र प्रहरी सडकमा खटिएसँगै जिल्ला सुरक्षा समन्वय समितिकै मातहतमा रहेको सेनालाई कारबाहीको लागिभन्दा पनि कोभिड महामारीविरुद्ध अभियान चलाउन खटाइएको हो ।

सुनसरीमा सक्रिय संक्रमितको संख्या अत्यधिक बढेको, मृतकहरूको संख्या पनि बढेपछि जिल्ला प्रशासनले जेठ १५ गतेसम्म निषेधाज्ञा जारी गरेको छ । निषेधाज्ञाको समयमा पनि मानिसहरू घुमफिरमा निस्कने, बाहिर सटर लगाए पनि भित्र उपभोक्तासँग कारोबार गर्ने, अनावश्यक सवारीसाधन चलाउने गरेकाले थप कडाइ गरेको प्रजिअ ढकालले बताए । मेडिकल, एम्बुलेन्स र अत्यावश्यकबाहेकका सबै सेवा बन्द गरिएको छ ।

प्रजिअ ढकालले निषेधाज्ञालाई थप व्यवस्थित गर्न र सचेतना फैलाउन सेना परिचालन गरिएको बताए । उनका अनुसार जिल्ला सदरमुकाम इनरुवा, धरान र इटहरी उपमहानगरपालिका क्षेत्र आसपास सेनाले गस्ती गर्ने र स्थानीयलाई सम्झाउन थालेका छन् । सेनाले वीरगन्ज, काठमाडौं, दाङलगायतबाट खाली सिलिन्डर लिएर आउनेलाई सुनसरीमा भएका तीन उद्योगबाट भरेर पठाइदिने र आइसोलेसन सेन्टरमा खट्ने गरिरहेको प्रजिअ ढकालले बताए । जिल्ला प्रशासनले पूर्ण निषेधाज्ञाको समयमा कसैले उल्लंघन गरेको सूचना पाए संक्रमण ऐन, २०२० अनुसार पक्राउ गरी कारबाही गर्न प्रहरीलाई निर्देशनसमेत दिइएको उनले बताए ।

सुनसरीमा कोरोनाको दोस्रो लहर चलेयता ४७ जनाको ज्यान गइसकेको छ । तीमध्ये शनिबारसम्म धरानमा १७ जना, इटहरीमा ११ जना, इनरुवामा १० जना, बराहक्षेत्रमा ४ जना, कोसीमा २ जना र देवानगन्ज, गढी, बर्जुमा एक–एक जनाले ज्यान गुमाइसकेका इनरुवास्थित स्वास्थ्य कार्यालय अधिकृत दीक्षा श्रेष्ठले बताइन् । उनका अनुसार कोरोनाको दोस्रो लहरमा हालसम्ममा सक्रिय संक्रमित १ हजार ९ सय ८८ जना रहेका छन् भने ४ सय ६५ जना निको भएका छन् । अघिल्लो लहरमा सुनसरीमा १ सय ५५ जनाले ज्यान गुमाएका थिए ।

यसैबीच धरान उपमहानगरपालिकाका स्वास्थ्य महाशाखा प्रमुख उमेश मेहताले शनिबार बिहान धरान–११ र १५ का दुई जना संक्रमितको मृत्यु भएको बताए । उनका अनुसार वडा–११ का ४० वर्षीय पुरुषको धरान–१० पुतलीलाइनस्थित विजयपुर हस्पिटल, धरान–१५ की ८५ वर्षीया वृद्धाको बीपी कोइराला स्वास्थ्य विज्ञान प्रतिष्ठानको कोभिड अस्पतालमा उपचारका क्रममा मृत्यु भएको हो ।रदीप मेन्याङ्बो