काठमाडौं । नेपाली काँग्रेसका सभापति शेरबहादुर देउवाले अबको केही दिनभित्रै मुलुकको राजनीतिले कोल्टे फेर्ने बताएका छन् । बुधबार बूढानीलकण्ठमा बसेको काँग्रेसको पूर्वपदाधिकारी तथा वर्तमान पदाधिकारीको बैठकमा सभापति देउवाले ओली सरकार ढाल्न तीन दलबीच सहमति नजिक रहेको र अबको केही दिनमै राजनीतिले कोल्टे फेर्ने बताएका हुन् ।
उनले बैठकमा भनेका छन्, ‘चिजको विकास निकै क्लियर भइसकेको र अब केही दिनमै अब राजनीतिले कोल्टे फेर्दैछ । निरन्तरको छलफल फलदायी बन्दै छ ।’
जसपाभित्र अध्यक्ष महन्थ ठाकुर र राजेन्द्र महतोको समूह प्रधानमन्त्री आलीसँगै वार्ता गरेर सरकारमा जाने अडानमा रहेको छ तर, अध्यक्ष उपेन्द्र यादव र डा. बाबुराम भट्टराई ओलीको विकल्प खोजेर जाने अडानमा छन् ।
बुधबार देउवा यसकारण पनि उत्साहित भएका छन्– कर्णाली सरकारमा एमालेले फ्लोर क्रस गरेझैँ नेपाल–खनाल समूहले गर्ने र जसपाको एउटा समूहले सघाएपछि कांग्रेस नेतृत्वको सरकार ढुक्कले बन्नेछ ।
साथै, बैठकमा देउवाले नेकपा माओवादीले ओली सरकारलाई दिँदै आएको समर्थन छिट्टै फिर्ता लिएर सरकार गठनमा बाटो खोल्ने पनि बताएका छन् । ‘माओवादीले औपचारिक रुपमै समर्थन फिर्ता लिन्छ, जसपा जसरी पनि हामीतिरै आउँछ।’ देउवाको भनाइ रहेको छ ।
