-
भन्सारतर्फ २ करोड ६९ लाख संकलन
-
अपराध नियन्त्रणमा कुनै सम्झौता गर्दैनौं’
- कपिलवस्तु : पुस ५ गते आइतबार ।।
- जनप्रभाव – सम्बादाता
कपिलवस्तु जिल्लाको शिवराज नगरपालिका—५ चन्द्रौटामा गत मंसिर २७ गते एक महिलाको शव फेला प¥यो । चन्द्रौटाको पुरानो बजारमा डेरा गरी बस्दै आएकी दाङ सतवरिया घर भएकी ५९ वर्षीया सुशीला खड्काको विभत्स रुपमा हत्या भएको थियो । उनको हत्या गर्न टाउको तथा मुखमा धारिलो हतियारले प्रहार गरिएको थियो ।
घटनाको जानकारी पाएलगत्तै कपिलवस्तु प्रहरीले अनुसन्धानलाई तीव्र पारिहाल्यो । हत्यारा पक्राउ गर्न प्रहरीको तालिमप्राप्त कुकुरको प्रयोग गरियो । प्रहरीको तदारुकताका कारण घटना भएको २४ घण्टा नबित्दै दोषी पक्राउ परिहाले । हत्यामा संलग्न थिए, सुशीलाको आफ्नै भतिज तोरणबहादुर खड्का । रक्सी खाएर झगडा हुँदा तोरणले लोहोरोले हानेर सुशीलाको हत्या गरेको प्रहरीलाई दिएको बयानमा उल्लेख छ ।
कपिलवस्तु प्रहरीले पाएको सफलताको यो त एउटा प्रतिनिधि उदाहरण मात्र हो । चालू आर्थिक वर्षको ५ महिनामा कपिलवस्तु प्रहरीले अपराध गरेर वर्षौंदेखि फरार रहेका १०३ जनालाई पक्राउ गरेको छ । उनीहरुको कैद ३५ वर्ष ५ महिना २९ दिन रहेको छ, साथै प्रहरीले जरिवानाबापत १६ लाख ७२ हजार रुपैयाँ असुल उपर गरेको छ ।
-
भन्सारतर्फ २ करोड ६९ लाख संकलन
भन्सार चोरी निकासी नियन्त्रणतर्फ पनि कपिलवस्तु प्रहरीले उल्लेख्य सफलता हासिल गरेको छ । चालू आवको साउनदेखि मंसिरसम्म ५ महिनामा उक्त शीर्षकमा २ करोड ६९ लाख ७९ हजार रुपैयाँ संकलन भएको छ । जब कि गत आव २०७६/७७ मा उक्त शीर्षकमा १ करोड २ लाख ७४ हजार रुपैयाँ संकलन भएको थियो । त्यस्तै, आव २०७५/७६ मा १ करोड ३८ लाख र आव २०७४/७५ मा १ करोड ९ लाख संकलन भएको थियो ।
यस्तै, लागूऔषध ओसारपसार नियन्त्रणका क्रममा प्रहरीले विगत ५ महिनामा २८ जनालाई पक्राउ गरेको छ । उनीहरुको साथबाट ब्राउन सुगर ८८ ग्राम ६६६ मि., चरेस ३७ केजी, अफिम १०.५ केजी, नाइट्राभेट २३४४ ट्याब्लेट र ट्रामोल ५२० क्याप्सुल बरामद गरिएको छ ।
नदीजन्य सामग्रीको चोरी निकासी नियन्त्रणका क्रममा ४ लाख ९५ हजार रुपैयाँ संकलन भएको कपिलवस्तु प्रहरीले जानकारी दिएको छ । कार्यालयका अनुसार उक्त शीर्षकमा गत आवमा १ लाख ५० हजार रुपैयाँ संकलन भएको थियो । यस्तै, विभिन्न जातका अवैध काठ २८७.३ क्युफिट बरामद भएको छ, जसको मूल्य ४ लाख ६१ हजार बराबर रहेको छ ।
प्रहरीले उक्त अवधिमा अवैध सुन ५०० ग्राम (४२ लाख ३ हजार रुपैयाँ) र अवैध चाँदी ५.२२० केजी (३ लाख ५८ हजार रुपैयाँ) बरामद गरेको छ । अवैध सुनचाँदीमा ओसारपसारमा संलग्न ७ जना पक्राउ परेका छन् ।
-
‘अपराध नियन्त्रणमा कुनै सम्झौता गर्दैनौं’
जिल्ला प्रहरी कार्यालय कपिलवस्तुका प्रमुख एसपी नवराज अधिकारीले झैझगडा, महिला हिंसा, सवारी दुर्घटना, फरार प्रतिवादी र तस्करीसँग सम्बन्धित अपराधलाई प्राथमिकतामा राखेर काम गर्दै आएको जानकारी दिए । कपिलवस्तु जस्तो कोभिडको उच्च जोखिममा रहेको र सबैभन्दा बढी प्रहरी संक्रमित भएको जिल्ला भए पनि अपराध नियन्त्रणतर्फ कुनै सम्झौता नगरिएको उनले बताए ।
‘यस जिल्लामा ९३ किलोमिटर खुला सीमा छ,’ उनले भने, ‘कोभिडको यो विषम परिस्थितिमा पनि हामीले खुला सीमाबाट हुने तस्करी र अपराध नियन्त्रणका लागि प्रहरी परिचालन गरिरहेका छौं ।’ विभिन्न किसिमका अपराध, तस्करी नियन्त्रण र फरार अपराधी पक्राउलगायत कामका लागि छुट्टाछुट्टै टिम बनाएर काम गरिरहेको उनले जानकारी दिए । एसपी अधिकारीका अनुसार यस अवधिमा प्रतिबन्धित विप्लव समूहका ५ जना कार्यकर्तालाई पक्राउ गरी अनुसन्धान भइरहेको छ ।
कपिलवस्तु प्रहरीले सामुदायिक प्रहरी साझेदारी कार्यक्रमअन्तर्गत कोभिड—१९ को महामारीबाट बच्न जनचेतनामूलक कार्यक्रम अन्तर्गत माईकिङ, पर्चा पम्पलेट वितरण, मास्क वितरण लगायतका कार्यक्रमहरु गर्दै आएको छ । यस्तै, घरेलु हिंसा, यौनजन्य हिंसा तथा लागुऔषध नियन्त्रण सम्बन्धमा सामुदायिक प्रहरी साझेदारी कार्यक्रम ४३१ र विद्यालय सम्पर्क कार्यक्रम ३२ ओटा सञ्चालन गरिएको छ ।
