काठमाडौ । नेपाल मिडिया सोसाइटीले मिडिया काउन्सिल विधेयकबारे काठमाण्डौमा श्रावण २१ गते अन्तरक्रिया कार्यक्रम सम्पन्न गरेको छ । सोसाइटीले प्रस्तावित मिडिया काउन्सिल विधेयकबारे गम्भीर सरोकार राख्दै अन्तरक्रिया कार्यक्रम सम्पन्न गरेको हो ।
कार्यक्रम संस्थाका अध्यक्ष मदन लम्सालको अध्यक्षता, महासचिव बोधराज त्रिपाठीको सञ्चालन तथा कार्यक्रम संयोजक धर्मराज भुसालको बिषय प्रवेशसँगै प्रेस काउन्सिल नेपालका पूर्व अध्यक्ष राजेन्द्र दाहाल, नेपाल पत्रकार महासंघका पूर्व अध्यक्षद्वय तारानाथ दाहाल र शिव गाउले, महासंघका महासचिव रामप्रसाद दाहाल, वरिष्ठ अधिवक्ता टिकाराम भट्टराई, अधिवक्ता रमण कर्ण र कान्तिपुर दैनिकका प्रधान सम्पादक उमेश चौहानले विधेयकका विविध पक्ष बारेमा आ–आफ्ना धारणा प्रस्तुत गर्नु भएको थियो ।
अन्तरक्रिया कार्यक्रममा सहभागी विज्ञ, सम्पादक तथा मिडिया सञ्चालकहरूले प्रस्तावित मिडिया काउन्सिल विधेयक मिडियाको समग्र हित र गरिमा बढाउने तथा नियमन गर्ने भन्दा नियन्त्रणमुखी देखिएको भन्दै गम्भीर आपत्ति जनाउनु भएको थियो ।
कार्यक्रममा सहभागि बक्ताहरुले यथास्थितिमा मिडिया काउन्सिल विधेयक जारी हुन नहुने राय व्यक्त गर्नु भयो । साथै काउन्सिल मिडिया सञ्चालक, श्रमजीवी पत्रकारहरू तथा सरोकारवालाहरुबीचको उच्चस्तरको संयोजनकारी संयन्त्र बन्नुपर्नेमा जोड दिनु भयो ।
छलफलमा नेपाल मिडिया सोसाईटीका उपाध्यक्ष महेश स्वाँर, सचिव नवराज कुँवर, कोषाध्यक्ष डा. जनकराज पन्त तथा दैनिक पत्र राष्टिय दैनिकका प्रधान सम्पादक डा. बालकृष्ण चापागाईलगायतको उपस्थिति रहेको थियो ।नेपाल मिडिया सोसाइटीले सरोकारवालासँग थप परामर्श गर्दै विधेयकमा आवश्यक संशोधनको माग गर्न सरकार समक्ष औपचारिक धारणा पेश गर्ने तयारी गरेको छ ।
